کورونا کے کیسوں میں اضافہ پر تلنگانہ ہائی کورٹ حکومت پر برہم _ عوام کو جمع ہونے سے کیوں روکا نہیں جا رہا ہے؟

حیدرآباد _ تلنگانہ ہائی کورٹ نے ریاست میں کورونا کی صورتحال کی سماعت کی اور حکومت کے موقف پر شدید ناراضگی اور برہمی کا اظہار کیا۔عدالت نے سوال کیا کہ عوامی اجتماعات کو کم کرنے کے لئے اقدامات کیوں نہیں کئے گئے؟سنیماگھروں،پبس اور بارس میں عوام کی تعداد کو کم کرنے کے لئے کیا اقدامات کے گئے؟عدالت نے کہا کہ حکومت کی جانب سے اس مسئلہ پر عدالت میں پیش کردہ رپورٹ میں تفصیلات کی کمی ہے۔بنچ نے سرکاری وکیل سے سوال کیا کہ کیا پبس،شراب کی دکانات اہم ہیں؟اس موقع پر ایڈوکیٹ جنرل نے کہا کہ حکومت جلد ہی بڑے عوامی اجتماعات پر قابو پانے کے اقدامات کرے گی۔عدالت نے کہا کہ ایک ایسے وقت جب عوام کی زندگیوں کو خطرہ ہے، حکومت کب فیصلہ کرے گا ؟عدالت نے برہمی کا اظہار کرتے ہوئے کہا کہ کیا آپ چاہتے ہیں کہ اس خصوص میں ہائی کورٹ ہدایت دے؟