کیرالا کے دو مسلم طلباء باسط اور جابر نے آن لائن رامائن کوئز مقابلہ جیت لیا

نئی دہلی _ 7 اگست ( اردولیکس ڈیسک) ملاپورم، کیرالہ سے تعلق رکھنے والے دو مسلم طلباء باسط اور جابر  نے آن لائن رامائن کوئز مقابلہ جیت کر سب  کو حیران کر دیا ہے۔ عظیم مہاکاوی کے گہرائی سے علم نے باسط اور جابر کو کوئز مقابلہ میں کامیابی حاصل کرنے میں مدد کی ہے۔ مقابلے کا انعقاد معروف پبلشر کمپنی ڈی سی بوکس نے آن لائن کیا تھا۔

 

دونوں شمالی کیرالہ ضلع کے ویلانچیری میں کے کے ایس ایم اسلامک اینڈ آرٹس کالج کے طالب علم ہیں۔ طلباء کا کہنا تھا کہ وہ بچپن سے ہی اس مہاکاوی کے بارے میں جانتے ہیں۔ انہوں نے وافی کورس میں شامل ہونے کے بعد رامائن اور ہندو مت کے بارے میں گہرائی سے پڑھنا اور سیکھنا شروع کیا، جس کے نصاب میں تمام بڑے مذاہب کی تعلیمات ہیں۔

جابر نے کہا کہ ‘تمام ہندوستانیوں کو مہاکاوی رامائن اور مہابھارت کو پڑھنا اور سیکھنا چاہیے کیونکہ یہ ملک کی ثقافت، روایت اور تاریخ کا حصہ ہیں۔ میرا ماننا ہے کہ ان کے عقائد کو سیکھنا اور سمجھنا ہماری ذمہ داری ہے۔ رام کو اپنے قابل احترام والد دشرتھ سے کیے گئے وعدے کو پورا کرنے کے لیے اپنی بادشاہی بھی قربان کرنی پڑی۔ اقتدار کے لیے لامتناہی جدوجہد کے دور میں رہتے ہوئے، ہمیں رام جیسے کرداروں اور رامائن جیسی مہاکاوی کے پیغام سے تحریک حاصل کرنی چاہیے۔

 

باسط نے کہا کہ وسیع پیمانے پر پڑھنے سے دوسرے مذاہب اور ان طبقات کے لوگوں کو مزید سمجھنے میں مدد ملے گی۔ انہوں نے کہا کہ کوئی بھی مذہب نفرت کو فروغ نہیں دیتا بلکہ صرف امن اور ہم آہنگی کا پرچار کرتا ہے۔ انہوں نے کہا کہ کوئز جیتنے سے انہیں مہاکاوی کو مزید گہرائی سے سیکھنے کی ترغیب ملی ہے۔