حیدرآباد میں ہندو بھائیوں کی جانب سے مسجد میں دعوت افطار کا اہتمام
ملک میں نفرت کے ماحول کو ختم کرنے پر زور۔ قومی یکجہتی کا متاثرکن مظاہرہ
حیدرآباد۔ 18 اپریل (پریس نوٹ) ایک ایسے وقت جب ملک میں مفادات حاصلہ کی جانب سے نفرت پیدا کرنے کی کوششیں کی جا رہی ہیں اور دلوں میں زہر بھرے جا رہے ہیں، آج بھی کچھ لوگ ہیں جو معاشرے میں محبت و ہم آہنگی کو فروغ دینے کے لئے کوشاں ہیں۔
ایسے ہی چند نوجوانوں نے ایک انوکھی مثال قائم کی ہے۔ مسجد فردوس چنتل کنٹہ چیک پوسٹ میں مقامی ہندو نوجوانوں کی جانب سے 17 اپریل بروز پیر ایک دعوت افطار اور عشائیہ کا اہتمام کیا تھا۔ اس گنگاجمنی تہذیب کے مظاہرے کی مقامی افراد نے ستائش کی۔ مقامی بزرگوں، نوجوانوں اور برادران وطن کی کثیرتعداد نے اس دعوت افطار میں شرکت کی اور ملک میں محبت کی فضاء کو پروان چڑھانے پر زور دیا۔ مقامی ہندو نوجوانوں نے مسجد میں دعوت افطار کے اہتمام کی اجازت دینے پر مسجد کی انتظامی کمیٹی کا شکریہ ادا کیا۔
اس پروگرام کے اہتمام میں محمد قیصر، قائد امجد خان، مختار، حاجی اور مقامی ہندو نوجوان نکھل، راجیش، شنکر، راجو اور ان کے دوست احباب نے سرگرم رول ادا کیا۔ افطار کے دوران قومی یکجہتی کے متاثرکن نظارے دیکھے گئے۔ ملک میں انتشار کے ماحول میں ایسی کوششیں قومی یکجہتی کے فروغ اور فرقہ پرست طاقتوں کو شکست دینے میں اہم رول ادا کریں گی۔
