ایران کے ساتھ جنگ پر امریکی کیا سوچتے ہیں امریکی شہری، سروے رپورٹس میں انکشاف
نئی دہلی: امریکی صدر ڈونلڈ ٹرمپ کی جانب سے ایران کے خلاف شروع کی گئی فوجی کارروائی پر امریکی عوام میں مختلف آراء سامنے آ رہی ہیں۔ جنگ کے آغاز کے بعد کیے گئے متعدد سروے کے مطابق
ٹرمپ کو اس معاملے میں حمایت کے مقابلے میں زیادہ مخالفت کا سامنا ہے۔ اگرچہ بہت سے امریکی ایران کو امریکہ کی سلامتی کے لیے خطرہ سمجھتے ہیں لیکن فوجی کارروائی کے بارے میں بڑی تعداد میں لوگ تشویش کا اظہار کر رہے ہیں۔
* حال ہی میں کیے گئے ایک سروے کے مطابق ہر دس میں سے سات امریکیوں نے اس بات پر تشویش ظاہر کی کہ جنگ کی وجہ سے تیل اور گیس کی قیمتیں بڑھ سکتی ہیں۔
* زیادہ تر لوگوں کا خیال ہے کہ ایران کے خلاف امریکی فوجی کارروائی ایک ماہ یا اس سے بھی زیادہ عرصے تک جاری رہ سکتی ہے۔
* کوئننی پیاک یونیورسٹی کی جانب سے کیے گئے سروے میں 53 فیصد امریکیوں نے ایران کے خلاف جنگ کی مخالفت کی جبکہ ہر دس میں سے صرف چار افراد نے اس کی حمایت کی۔
* جنگ شروع ہونے کے فوراً بعد واشنگٹن پوسٹ اور سی این این کے سروے میں بھی اسی طرح کے نتائج سامنے آئے۔ حالیہ فاکس نیوز سروے میں تقریباً آدھے لوگوں نے حمایت کی جبکہ باقی نے مخالفت کی۔
* کئی حالیہ سروے کے مطابق امریکیوں کا کہنا ہے کہ ایران کے خلاف فوجی کارروائی کے حوالے سے ٹرمپ انتظامیہ نے واضح وجوہات یا مکمل وضاحت فراہم نہیں کی۔
* اس کے علاوہ یہ سوال بھی اٹھایا جا رہا ہے کہ کیا واقعی وائٹ ہاؤس کے دعوے کے مطابق ایران سے امریکہ کو براہِ راست خطرہ لاحق ہے؟
* سروے میں یہ بھی سامنے آیا کہ بہت سے امریکی اس بات پر بھی فکر مند ہیں کہ کہیں یہ جنگ مزید پھیل نہ جائے۔
