ایران-امریکہ کشیدگی میں نیا موڑ: حملوں کو 10 دن تک روک دینے ٹرمپ کا اعلان

امریکہ اور ایران کے درمیان جنگ کے خاتمے سے متعلق مذاکرات پر بدستور غیر یقینی صورتحال برقرار ہے۔ اسی دوران امریکی صدر ڈونالڈ ٹرمپ نے ایک اہم بیان جاری کیا ہے۔ انہوں نے اعلان کیا کہ ایران کی توانائی تنصیبات پر حملوں کو مزید 10 دن کے لیے روک دیا گیا ہے۔

 

ٹرمپ نے سوشل میڈیا پلیٹ فارم ٹروتھ سوشل پر پوسٹ کرتے ہوئے کہا کہ یہ فیصلہ تہران حکومت کی درخواست پر کیا گیا ہے۔

 

واضح رہے کہ حالیہ کشیدگی کے دوران بند کیے گئے آبنائے ہرمز کو دوبارہ کھولنے کے لیے ٹرمپ نے ایران کو الٹی میٹم بھی دیا تھا۔ بعد ازاں انہوں نے اپنے مؤقف میں نرمی لاتے ہوئے کہا کہ ایران کے ساتھ مذاکرات جاری ہیں اور توانائی کے بنیادی ڈھانچے اور بجلی گھروں پر حملوں کو پہلے 5 دن کے لیے مؤخر کیا گیا تھا۔

 

اب اس وقفے کو مزید بڑھاتے ہوئے 10 دن یعنی 6 اپریل تک توسیع دی گئی ہے۔ ٹرمپ کے مطابق جنگ کے خاتمے سے متعلق ایران کے ساتھ مذاکرات بہت اچھے انداز میں آگے بڑھ رہے ہیں اور پیش رفت کے آثار بھی نظر آ رہے ہیں۔ انہوں نے میڈیا میں گردش کرنے والی غلط خبروں پر یقین نہ کرنے کی اپیل کی۔

 

تاہم یہ واضح نہیں ہو سکا ہے کہ یہ 10 روزہ مہلت مستقل جنگ بندی کی طرف پیش رفت ثابت ہوگی یا محض وقتی طور پر کشیدگی میں کمی کا سبب بنے گی۔