لڑکے والوں نے شادی کا رشتہ اچانک توڑ دیا – بیٹی کی شادی منسوخ ہونے پر باپ نے کرلی خودکشی ؛ حیدرآباد میں افسوناک واقعہ
بیٹی کی شادی منسوخ — صدمہ برداشت نہ کرتے ہوئے باپ کی خودکشی، حیدرآباد میں دل دہلا دینے والا واقعہ
حیدرآباد میں افسوسناک واقعہ پیش آیا جہاں بیٹی کی شادی آخری لمحے پر منسوخ ہونے سے صدمہ برداشت نہ کرپانے والے باپ نے خودکشی کرلی۔
تفصیلات کے مطابق حیدرآباد کے ایک کارپوریٹ ہاسپٹل میں ڈاکٹر کے طور پر کام کرنے والی لڑکی کی شادی کا رشتہ وشاکھاپٹنم کے پندورتی کے قریب چنمشیڈی واڑہ کے رہائشی بینک ملازم کے ساتھ طے کیا گیا تھا۔ لڑکی کے والد سرینواس راؤ نے بڑے جوش و خروش کے ساتھ شادی کی تمام تیاریاں مکمل کرلیں اور شادی کے کارڈ بھی تقسیم کردیے تھے۔
اسی دوران لڑکے والوں نے اچانک شادی منسوخ کرنے کا فیصلہ سنا دیا۔ اس غیر متوقع فیصلے سے والد گہرے صدمے میں چلے گئے۔ انہوں نے بارہا لڑکے والوں سے فیصلے پر نظرثانی کی درخواست کی اور حتیٰ کہ ان کے قدموں میں گر کر بیٹی کی زندگی برباد نہ کرنے کی منت بھی کی، مگر انہوں نے کوئی نرمی نہ دکھائی اور شادی منسوخ کرنے کے فیصلے پر قائم رہے۔
شدید ذہنی دباؤ اور بے بسی کی حالت میں سرینواس راؤ نے کیڑے مار دوا پی لی، جس سے ان کی موت واقع ہوگئی۔ والد کی اس المناک خودکشی نے نہ صرف ان کے خاندان بلکہ عزیز و اقارب اور جاننے والوں کو بھی رنج و صدمے میں مبتلا کردیا۔
