سعودی عرب سڑک حادثہ – حیدرآباد کے دو ٹور آپریٹرس سے عمرہ کو روانہ ہوئے تھے زائرین

سعودی عرب میں پیش آئے دلخراش سڑک حادثے میں عمرہ کی ادائیگی کے لیے گئے حیدرآباد کے زائرین کی ایک بس ڈیزل ٹینکر سے ٹکرا کر آگ کی لپیٹ میں آ گئی، جس کے نتیجے میں 42 افراد موقع پر ہی جل کر جاں بحق ہوگئے۔ یہ سانحہ پیر کی علی الصبح تقریباً 1 بج کر 30 منٹ پر بدر–مدینہ شاہراہ کے مفرحت علاقہ میں پیش آیا۔

 

ذرائع کے مطابق جاں بحق ہونے والوں میں بیشتر کا تعلق حیدرآباد اور تلنگانہ کے مختلف مقامات سے ہے۔ یہ تمام زائرین شہر کے آن ٹور آپریٹرس—  حفصہ ؛ بابل حرمین اور المکہ— کے ذریعے عمرہ کے لیے روانہ ہوئے تھے۔ بتایا جاتا ہے کہ سانحہ کے بعد سعودی حکام نے ان ٹور آپریٹرس کو ہلاک شدگان کی شناخت، قانونی کارروائی اور دیگر رسمی امور کی تکمیل کے لیے فوری طور پر سعودی عرب طلب کیا ہے، اور وہ روانہ ہوچکے ہیں۔

 

میڈیا رپورٹس کے مطابق زائرین عمرہ کی ادائیگی کے بعد مکہ مکرمہ سے مدینہ منورہ واپس جا رہے تھے کہ یہ ہولناک حادثہ پیش آیا۔ ہلاک شدگان میں 20 خواتین اور 11 بچوں کی موجودگی کی بھی اطلاع ہے۔ مقامی میڈیا نے 42 اموات کی تصدیق کی ہے، تاہم سعودی حکام کی جانب سے ہلاک اور زخمی ہونے والوں کی حتمی تعداد کے باضابطہ اعلان کا ابھی انتظار ہے۔

 

اس اندوہناک واقعہ نے ریاست تلنگانہ میں غم کی لہر دوڑا دی ہے، جبکہ متاثرہ خاندانوں کو سرکاری سطح پر مدد و رہنمائی فراہم کرنے کی کوشش کررہے ہیں۔