غزہ میں جو کچھ ہورہا ہے پوری دنیا پر سنگین نتائج مرتب ہوں گے: سعودی مندوب
ریاض ۔ کے این واصف
فلسطین، اسرائیل کے درمیان جنگ بندی سے متعلق اقوام متحدہ میں عالمی رائے عامہ کے لئے جو ووٹنگ کرائی گئی اس میں چند اہم مملک نے اپنے آپ کو دور رکھا لیکن سعودی عرب نے اپنا موقف دو ٹوک انداز میں واضح کردیا۔اقوام متحدہ میں سعودی عرب کے مندوب عبدالعزیز الواصل نے کہا ہے کہ غزہ میں جو کچھ ہو رہا ہے خطے اور پوری دنیا پر اس کے سنگین نتائج مرتب ہوں گے۔
الاخباریہ چینل کے مطابق سعودی مندوب عبدالعزیز الواصل نے کہا کہ ’سعودی عرب غزہ سے فلسطینیوں کی جبری بے دخلی اور شہریوں کو نشانہ بنانے کی مذمت کرتا ہے۔‘الواصل نے جمعہ کو اقوام متحدہ کی جنرل اسمبلی کے سامنے سعودی موقف پیش کرتے ہوئے کہا کہ ’قیام امن کی جدوجہد، بین الاقوامی معاہدوں کی پابندی اور خودمختار فلسطینی ریاست کے قیام کے لیے امن مشن کو ترجیح دینا ہو گی۔‘
سعودی مندوب نے کہا کہ غزہ کا بحران دو ریاستی حل اور فلسطینی علاقوں پر سے ناجائز قبضہ ہٹانے کے سلسلے میں عالمی برادری کی لاپروائی کا نتیجہ ہے۔‘الواصل نے خبردار کیا کہ ’خطے میں کشمکش کا دائرہ وسیع ہو سکتا ہے۔‘سعودی مندوب نے انسانی امداد ہنگامی بنیاد پر غزہ پہنچانے کا مطالبہ کیا۔
الواصل نے کہا کہ ’انسانی المیے کی مذمت یا فلسطینی عوام کے باوقار زندگی کے حق کی حمایت اور فلسطینیوں کی زندگی کے المناک حالات کا باعث بننے والے حملے کی مذمت کے سلسلے میں عالمی برادری کی ہچکچاہٹ افسوسناک ہے۔‘
