بی جے پی رکن اسمبلی راجہ سنگھ کی گرفتاری کے بعد حیدرآباد کے علاوہ ریاست بھر میں پولیس کی چوکسی

حیدرآباد _ 23 اگست ( اردولیکس) محسن انسانیت حضور اکرم ؐ کی شان اقدس میں تلنگانہ بی جے پی کے رکن اسمبلی راجہ سنگھ کی جانب سے گستاخی کئے جانے کے ویڈیو کے وائرل ہونے کے بعد شہرحیدرآباد میں کمشنر پولیس حیدرآباد کے دفتر کے ساتھ ساتھ شہر کے کئی حصوں میں بڑے پیمانہ پرمسلمانوں کے شدید احتجاج اورغم وغصہ پر گستاخ رکن اسمبلی کو گرفتار کرلیاگیا۔ احتجاجیوں نے راجہ سنگھ کی گرفتاری کا مطالبہ کیاتھا۔

پولیس کے سینئر عہدیداروں نے صبح میں اجلاس منعقد کرتے ہوئے ریاست کی مکمل پولیس مشنری کو چوکس کردیا۔پیشرو اضلاع عادل آباد، کریم نگر، نظام آباد، وقارآباد، محبوب نگرمیں غیر سرکاری ہائی الرٹ کا اعلان کردیاگیا ہے۔سوشیل میڈیا کی اطلاعات کے مطابق راجہ سنگھ کے خلاف شہر میں مختلف پولیس اسٹیشنوں کے حدود میں احتجاج کاامکان ہے۔مجلس کے رکن اسمبلی احمد بلعلہ دبیر پورہ پولیس اسٹیشن پہنچ گئے جہاں انہوں نے راجہ سنگھ کے خلاف شکایت درج کروائی۔ احمد بلعلہ نے دبیرپورہ پولیس اسٹیشن میں شکایت درج کروانے کے بعد برہم ہجوم سے خطاب کرتے ہوئے کہاکہ راجہ سنگھ کی گرفتاری کو یقینی بنایاجائے گا۔راجہ سنگھ کے خلاف حیدرآباد پولیس کمشنریٹ پر احتجاج کرنے پر کئی افراد کو گرفتارکیاگیا ہے۔تلنگانہ کے مختلف پولیس اسٹیشنوں میں راجہ سنگھ کے خلاف مختلف تنظیموں کی جانب سے شکایات کا سلسلہ جاری ہے۔اس گستاخانہ ویڈیو کے وائرل ہونے کے بعد مسلمانوں میں شدید برہمی کی لہر دیکھی گئی۔ راجہ سنگھ کے خلاف احتجاج کرتے ہوئے مجلسی لیڈروں نے چندرائن گٹہ پولیس اسٹیشن میں بھی شکایت درج کرائی اور پولیس اسٹیشن کے سامنے احتجاج کیا۔ اس موقع پر مجلسی کارکنوں نے راجہ سنگھ کے خلاف نعرے لگائے۔ مجلسی لیڈروں صمدبن عبدات اور سلیم بیگ نے بی جے پی ایم ایل اے کے خلاف پی ڈی ایکٹ لگانے کامطالبہ کیا۔ نٹراج نگرجھرہ میں بھی نوجوانوں نے احتجاج کیااور ٹپہ چبوترہ پولیس سے شکایت کی۔اس موقع پر میڈیا سے بات کرتے ہوئے مظاہرین نے زعفرانی جماعت کے رکن اسمبلی کو پھانسی کی سزادینے کامطالبہ کیا۔انہوں نے کہاکہ راجہ سنگھ ہمیشہ سے مسلم طبقہ کو نشانہ بناتا ہواآیا ہے

اپنی گرفتاری کے وقت راجہ سنگھ نے میڈیا سے بات کرتے ہوئے کہاکہ اس کو کوئی خوف نہیں ہے۔اس گستاخانہ ویڈیو کے منظرعام پرآنے کے بعد دبیرپورہ پولیس نے زعفرانی جماعت کے رکن اسمبلی کے خلاف معاملہ درج کیاتھا۔اس احتجاج پر پولیس نے کئی مظاہرین کو منگل کو گرفتار کرلیا۔دفتر کمشنر پولیس حیدرآباد، ڈی جی پی دفتر،پراناشہر حیدرآباد میں قدیم کمشنرپولیس دفتر کے ساتھ ساتھ شہر کے کئی اہم مقامات پر پولیس کی بھاری تعداد کو تعینات کردیاگیا کیونکہ کئی مقامات پر راجہ سنگھ کے خلاف مسلمانوں کی جانب سے مظاہرے شروع ہوگئے ہیں

۔ریاپڈ ایکشن فورس کے ساتھ ساتھ تلنگانہ اسٹیٹ پولیس کے مختلف شعبہ جات، گرے ہاونڈس اور پڑوسی اضلاع کی پولیس کو بھی حیدرآباد میں تعینات کردیاگیا۔پولیس کے پکٹس کو شہر کے حساس مقامات اورپرانا شہر میں تعینات کیاگیا۔