نماز کی ادائیگی کے بعد مسجد کے باہر کانگریس لیڈر پر نوجوان کا خنجر سے حملہ – ہدایت اللہ پٹیل کی موت

ممبئی _ مہاراشٹرا کانگریس کے نائب صدر ہدایت اللہ پٹیل پر منگل کے روز ضلع اکولا کی موہلا مسجد میں چاقو سے حملہ کیا گیا۔ شدید زخمی پٹیل چہارشنبہ کی صبح دورانِ علاج فوت ہوگئے پولیس نے اس واقعہ میں ایک ملزم کو گرفتار کر لیا ہے، جبکہ ابتدائی تفتیش کے مطابق حملہ پرانی رنجش کا نتیجہ بتایا جا رہا ہے۔

 

پولیس کے مطابق ہدایت اللہ پٹیل منگل کو موہلا گاؤں کی مسجد میں ظہر کی نماز ادا کر رہے تھے۔ تقریباً دیڑھ بجے نماز کے بعد جیسے ہی وہ مسجد سے باہر نکلے، ملزم نے تیز دھار ہتھیار سے ان کے گلے اور سینے پر وار کیا۔ حملہ کے فوراً بعد مقامی افراد نے انہیں ہاسپٹل منتقل کیا۔

 

پٹیل کو اکوت کے ایک خانگی ہاسپٹل امیں داخل کیا گیا، جہاں آئی سی یو میں ان کا علاج جاری تھا۔ تاہم چہارشنبہ کی صبح وہ زخموں کی تاب نہ لاتے ہوئے انتقال کر گئے۔ سوشل میڈیا پر وائرل ویڈیو میں انہیں خون آلود کپڑوں میں مسجد سے باہر نکلتے دیکھا جا سکتا ہے۔

 

پولیس نے قتل کے الزام میں 22 سالہ عبید خان کالو خان عرف رزیق خام پٹیل (22) کو گرفتار کیا ہے۔ ملزم کو منگل کی رات تقریباً 8 بجے اکوت تعلقہ کے پنَج گاؤں سے حراست میں لیا گیا۔ اس سلسلے میں کانگریس کی کونسلر سُورنہ کللاکنٹلا کی شکایت پر مقدمہ درج کیا گیا۔

 

پولیس کا کہنا ہے کہ حملہ پرانی رنجش کے سبب کیا گیا۔ حراست کے دوران ملزم نے تفتیش میں تعاون نہیں کیا، جس پر اس کے خلاف جوابی شکایت بھی درج کی گئی۔ مقدمے میں بھارتی تعزیراتِ ہند کی دفعہ 307 سمیت دیگر دفعات شامل کی گئی ہیں۔

 

واقعہ کے بعد پولیس نے موقع پر پہنچ کر فارنسک ماہرین کی مدد سے شواہد اکٹھے کئے۔ موہلا اور اکوت میں سکیورٹی بڑھا دی گئی ہے۔ ضلع پولیس سپرنٹنڈنٹ ارچت چندک صورتحال کا جائزہ لے رہے ہیں۔ اکوت دیہی پولیس نے اس معاملے میں فوجداری مقدمہ درج کر لیا ہے۔