معروف شاعر عتیق مظفر پوری کی برسی پر 18 اگست کو کتاب کی رونمائی

ایم ایس حسن، سینئر صحافی

بھوپال/نئی دہلی، 18 اگست بروز اتوار معروف صحافی اور شاعر عتیق مظفر پوری کی نویں برسی کے موقع پر نئی دہلی کے راؤژ ایونیو واقع آڈیٹوریم میں مرحوم کو یاد کیا جائے گا۔ ان کی زندگی اور جدوجہد پر ایک کتاب بھی جاری کی جائے گی۔ یہ سیمینار انجمن ترقی اردو (ہند) اور سائبان فاؤنڈیشن کے اشتراک سے منعقد کیا جائے گا، معروف صحافی اور شاعر عتیق مظفر پوری کی 9ویں برسی کے موقع پر جاوید رحمانی کی تحریر کردہ کتاب "عتیق مظفر پوری حیات و خدمت” کی رونمائی کی جائے گی۔

 

اس موقع پر منعقدہ سیمینار میں ’’اردو صحافت کے چیلنجز اور امکانات” کے موضوع پر بھی تفصیلی گفتگو ہوگی۔ اس پروگرام کی صدارت مولانا آزاد یونیورسٹی کے سابق ڈائریکٹر اور معروف ماہر تعلیم اختر الواسع کریں گے۔ پریس کونسل آف انڈیا کے رکن اور سینئر صحافی جے شنکر گپتا پروگرام کے پہلے مقرر ہوں گے۔ ان کے علاوہ اس پروگرام کے کچھ خاص مہمان بھی ہوں گے، ان میں اردو اکادمی دہلی کے وائس چیئرمین پروفیسر شہپر رسول، کانگریس پارٹی کے قومی ترجمان اور سابق ایم پی میم افضل، نئی دنیا اردو کے ایڈیٹر اور سابق ایم پی شاہد صدیقی، ایم ایل سی۔ اور اردو اخبار ہمارا سماج کے ایڈیٹر ڈاکٹر خالد انور، ڈاکٹر خواجہ افتخار احمد، ڈاکٹر اطہر فاروقی، ڈاکٹر معین شاداب اور سینئر صحافی اور سائبان اردو اور ہندی اخبار جرنلزم ٹوڈے کے ایڈیٹر جاوید رحمانی پروگرام میں اپنی اپنی ذمہ داریاں سرانجام دیں گے۔

 

عتیق مظفر پوری نے بڑے بڑے اخبارات میں بطور صحافی خدمات انجام دی اور وہ کبھی کسی دباؤ میں نہیں آئے اور نہ ہی کسی طرح سے سمجھوتہ کیا۔ مرحوم کی کتاب صحافت سے متعلق ایک خزانہ ہے جس میں صحافیوں کے مسائل اور چیلنجز کا حل بھی موجود ہے۔ یہ کتاب صحافت سیکھنے والے نوجوانوں کے لیے رہنمائی کا کام کرے گی۔