نہوڑ، یوپی میں H&EPT یوم ذیابطیس ریلی کا اہتمام کیا
نمائندہ اردو لیکس
عالمی یوم ذیابطیس، کے موقع پر ہیلتھ اینڈ ایجوکیشن پروموشن ٹرسٹ (ہیپٹ) نے نہٹور میں شوگر سے متعلق بیداری ریلی کا اہتمام کیا۔ سٹی انچارج پولس انسپکٹر بھارت سنگھ نے ایچ ایم آئی انٹر کالج سے ہری جھنڈی دکھا کر ریلی کا افتتاح کیا۔ یہ H&EPT کی یہ ریلی شوگر اینڈ بلڈ پریشر جانچ اور کاونسلنگ سنٹر، سٹی کراؤن پبلک اسکول، مہدی ولا میں اختتام پذیر ہوئی۔
اس موقع پر بھیجے گئے اپنے پیغام میں چیف ڈیولپمنٹ آفیسر بجنور ، شری پورن بورا آئی اے ایس نے ریلی کے روح رواں، ہیپٹ کے سکریٹری غزال مہدی اور ریلی کے تمام شرکاء کو تہہ دل سے مبارکباد دی ہے اور یہ یقین ظاہر کیا ہے کہ غزال مہدی اور انکی ٹیم کی کوششوں سے معاشرے میں صحت سے متعلق بیداری میں اضافہ ہو گا۔ ریلی میں ایچ ایم آئی انٹر کالج، گورنمنٹ گرلز انٹر کالج، ایس این ایس ایم انٹر کالج، وی کے انٹرنیشنل اسکول، بلرام کنور سرسوتی ودیا مندر انٹر کالج اور سائی ملینیم سینئر سیکنڈری اسکول کے طلباء، اساتذہ، ہیلتھ والنٹیروں، میڈیکل ایسوسی ایشن اور دیگر سماجی تنظیموں کے نمائندوں، نگر پالیکا کے وارڈ ممبران اور زندگی کے مختلف شعبوں سے تعلق رکھنے والے ذمہ داران نے شرکت کی۔
ریلی سے خطاب کرتے ہوئے ہیپٹ کے سکریٹری غزال مہدی نے کہا کہ انڈین کونسل آف میڈیکل ریسرچ کی رپورٹ کے مطابق بھارت میں 10 کروڑ 10 لاکھ افراد بلڈ شوگر میں مبتلا ہیں اور 13 کروڑ 60 لاکھ افراد پری ڈایابیٹک ہیں۔ اس طرح ملک میں 23 کروڈ 70 لاکھ افراد شوگر کے مرض سے متاثر ہیں۔ انہوں نے کہا کہ گزشتہ چار پانچ سالوں میں شوگر کے مریضوں کی تعداد میں 44 فیصد سے زائد اضافہ ہوا ہے جو کہ انتہائی تشویشناک ہے۔ اس ریلی سے خطاب کرتے ہوئے ریٹائرڈ پرنسپل ایس این ایس ایم انٹر کالج، میجر چرن سنگھ شرما، ایچ ایم آئی انٹر کالج کے پرنسپل بلال زیدی، گورنمنٹ گرلز انٹر کالج کی پرنسپل ببیتا رانی، ای رکشہ یونین کے صدر کامریڈ غلام صابر اور لندن میں مقیم سوشل ورکر محسن زیدی نے شوگر سے متعلق بیداری پھیلانے اور زیادہ سے زیادہ لوگوں کے ٹیسٹ کروانے پر زور دیا۔
جانچ سنٹر کے سینئر ہیلتھ کارکُن اطاعت حسین نے نظامت کے فرائض انجام دئیے۔
