عادل آباد کے محلہ چلکوری لکشمی نگر میں مقامی افراد کا احتجاج۔ پولیس سے مقامی بی جے پی کے ذمہ دار کے خلاف کاروائی کا مطالبہ

عادل آباد سے رقیب احمد یافعی کی رپورٹ

عادل آباد۔9/فروری(اردو لیکس)عادل آباد کے محلہ چلکوری لکشمی نگر میں پچھلے تین دنوں سے تنازعہ شدت اختیار کر چکا ہے۔ مقامی افراد نے الزام لگایا ہے کہ سمیع نامی ڈاکٹر جو اسی محلے کے رہائشی ہیں، ایک نہایت سادہ، خوش اخلاق اور مہذب شخصیت کے مالک ہیں، پر محلے کے ہی شخص زبیر نے ذاتی دشمنی کے تحت ظلم و ستم ڈھانے کا سلسلہ شروع کر دیا ہے۔ بتایا گیا ہے کہ زبیر جو کہ زعفرانی پارٹی سے تعلق رکھتا ہے، اپنے حامیوں کے ساتھ مل کر ڈاکٹر سمیع کے خلاف اپنے انتقامی جذبات کو ہوا دے رہا ہے۔

 

شکایت کی گئی ہے کہ تین روز قبل زبیر نے جنید نامی نوجوان سے رابطہ کرتے ہوئے ڈاکٹر سمیع کے گھر اور کلینک پر حملہ کیا اور ڈاکٹر سمیع کی گاڑی کو بھی نقصان پہنچایا۔ اس حملے کے بعد محلہ میں حالات کشیدہ ہوگئے اور عوام میں غم و غصہ کی لہر دوڑ گئی۔ محلے کے افراد  ڈاکٹر سمیع پر حملے کے بعد متحد ہوگئے اور زبیر کے خلاف سخت قانونی کارروائی کا مطالبہ کرتے ہوئے احتجاج شروع کر دیا۔پولیس ذرائع کے مطابق ڈاکٹر سمیع اور زبیر کی جانب سے علیحدہ علیحدہ شکایات درج کرائی گئی ہیں

 

جس کے نتیجے میں ٹو ٹاؤن پولیس اسٹیشن میں دونوں کے خلاف جوابی مقدمات درج کیے گئے ہیں۔ مزید برآں جمعہ کے روز ڈاکٹر سمیع کی شکایت پر پولیس نے زبیر کے خلاف ایک اور مقدمہ درج کیا، جس میں اس پر الزام ہے کہ اس نے ڈاکٹر سمیع کی گاڑی کا شیشہ توڑ دیا۔اگرچہ پولیس نے مقدمات درج کیے ہیں محلہ کے رہائشیوں کا الزام ہے کہ اس سلسلے میں پولیس نے اتنی سنجیدگی سے کارروائی نہیں کی جتنی کہ ضرورت ہے۔ مقامی افراد نے احتجاج کرتے ہوئے کہا کہ پولیس نے کئی بار توجہ دلانے کے باوجود زبیر کے خلاف سخت کارروائی نہیں کی۔ آج اتوار کو محلہ کے افراد نے میڈیا نمائندوں سے بات کرتے ہوئے اس معاملے کی تفصیلات سے واقف کروایا۔ محلہ کے لوگوں نے اپنے بیان میں کہا کہ زبیر نامی شخص جو خود کو زعفرانی پارٹی کا لیڈر ظاہر کرتا ہے، نے پورے محلے میں خوف و ہراس کی فضا قائم کر رکھی ہے اور مقامی افراد کا جینا دوبھر کر دیا ہے۔اہلیان محلہ نے بی جے پی کے رکن اسمبلی پایل شنکر سے مطالبہ کیا ہے کہ وہ فوری طور پر زبیر کے خلاف سخت کارروائی کریں اور اپنے آپ کو ایک حقیقی عوامی نمائندہ ثابت کریں۔

 

محلہ کے لوگوں کا یہ بھی کہنا ہے کہ اگر فوری طور پر کارروائی نہ کی گئی تو ان کے احتجاج میں مزید شدت آ سکتی ہے۔اس معاملہ کی اطلاع ملنے پر پولیس کی بھاری جمعیت کو محلہ چلکوری لکشمی نگر میں تعینات کردیا گیا ہے۔