حج سیزن میں میڈیسن اور بلڈ سیمپلز کی منتقلی بذریعہ ڈرون۔ سعودی وزیر صحت

ریاض ۔ کے این واصف 

 حجاج کی خدمات اور سہولتون میں اضافہ کے لیے انتظامیہ ہمیشہ کوشاں رہتاہے۔ سعودی وزیر صحت فہد الجلاجل نے کہا ہے کہ حج سیزن میں میڈیسن اور خون کے نمونے (بلڈ سیمپلز) کی منتقلی کے لیے ڈرون ٹیکنالوجی کے استعمال کو مزید فروغ دیا جائے گا۔

 

 

الاخباریہ کے مطابق جدہ میں حج وعمرہ کانفرنس و نمائش کے پانچویں ایڈیشن کے مذاکراتی اجلاس سے خطاب کرتے ہوئے وزیر صحت کا کہنا تھا مملکت آج بھی کنگ عبدالعزیز کے وضع کردہ خدمت طریقہ کار پر عمل پیرا ہے۔بانی مملکت نے 1952 میں واضح ہدایت کی تھی کہ عاززمین حج کی صحت کا ہرطرح سے خیال رکھا جائے۔ انہوں نے ہر حج مشن میں ڈاکٹر کو تعینات کرنے کی ہدایت کی تھی۔ اگرچہ اس وقت ڈاکٹروں کی قلت تھی مگر مملکت کی جانب سے حجاج کی صحت اولین ترجیح تھی۔

 

 

وزیر صحت کا کہنا تھا کہ مملکت کے وژن 2030 کے اہداف کے تحت عازمین حج کی خدمت کے معیار کو بہتر بناتے ہوئے متعدد حکومتی ادارے خدمتِ “ضیوف الرحمان” پروگرام سے منسلک ہیں۔فہد الجلال نے واضح کی ادارہ صحت دیگر وزارتوں اور اداروں کے ساتھ مل کرچیلنجز سے بہتر طورپر نمٹنے کے لیے پیشگی حکمت عملی مرتب کی جاتی ہے۔ مختلف نوعیت کے چیلنجز درپیش ہوتے ہیں جن میں موسمی، ماحولیاتی اور وبائی خطرات شامل ہیں۔

 

 

فہد الجلاجل کا کہنا تھا اس سال حج سیزن میں میڈیسن اور بلڈ سیمپلز کی منتقلی کے لیے ڈرونز نیٹ ورک میں اضافہ کیا جائے گا جس کے لیے متعلقہ کمپنیوں سے تعاون جاری ہے۔روایتی گاڑیوں کے ذریعے جو میڈیسن یا سیمپلز منتقل کیے جاتے تھے ان میں ڈیرھ سے تین گھنٹے کا وقت لگتا تھا مگر ڈرون کے ذریعہ یہ دورانیہ 5 سے دس منٹ کا ہوجائے گا جس سے طبی خدمات کا معیار بہتر ہو گا۔