سعودی عرب – تفریحی مقام “العلا” میں دنیا کی سب سے بڑی آئینوں سے ڈھکی عمارت

ریاض ۔ کے این واصف 

سن ۱۹۹۰ کے اوائل میں ریاض کے ڈپلومیٹک کواٹرز علاقہ میں ایک لائبریری تعمیر کی گئی تھی جو مکمل طور شیشہ سے بنی چوکور عمارت تھی۔ جس کو سب سے بڑی شیشہ کی عمارت ہونے کا اعزاز حاصل تھا۔

 

 

ایک اطلاع کے مطابق تفریحی مقام العلا کمشنری جو قدرتی حسن سے مالا مال ہے وہاں منفرد مقامات کی بھی کمی نہیں کو یہ اعزاز بھی حاصل ہے کہ یہاں دنیا کی سب سے بڑی آئینوں سے ڈھکی منفرد عمارت بنائی گئی ہے۔ چوکور عمارت کی بیرونی سمت کو 9740 آئینوں کی سلیٹوں سے ڈھکا گیا جس کے بعد اسے 26 دسمبر 2019 کو گنیز بک آف ورلڈ ریکارڈ میں باضابطہ طور پر دنیا کی سب سے بڑی آئینہ عمارت کے طورپر درج کیا گیا۔

 

 

سعودی خبررساں ایجنسی “ایس پی اے” کے مطابق العلا کے قدرتی حسن کو عصرِ حاضر کے جدید تعمیراتی اضافے نے دوبالا کردیا جو عالمی سطح پر ایک تعمیراتی شہکار کی حیثیت اختیار کر گیا ہے ۔آئینہ عمارت کے اندر بنے تھیٹر ہال میں 500 نشستوں کی گنجائش ہے جو جدید ترین صوتی نظام اور ٹیکنیکل سسٹم سے لیس ہے ۔

 

 

آئینہ ہال کو اس کے جدید طرز تعمیر کی وجہ سے متعدد ایوارڈز دیئے جا چکے ہیں جن میں “ارکیٹائزر اے” (آئینہ عمارت سازی زمرہ برائے سال 2020 ) بھی شامل ہے اس کے علاوہ دیگر ایوارڈز بھی اس عمارت کے منفرد انداز اور طرز تعمیر کے حوالے سے دیئے گئے ہیں۔