سعودی عرب – جدہ کا تاریخی “ریڈ سی میوزیم” مکمل، چھ دسمبر کو افتتاح
ریاض ۔ کے این واصف
سعودی عرب مسلسل بنیاد پر مملکت کے سیاحتی شعبہ کو ترقی دے رہا ہے۔ اس سلسلہ کی ایک کڑی کے طور پر عروس البلاد جدہ کے قدم علاقے کو سیاحی مقام میں بدلا جاناہے۔ یہ علاقہ عام سیاحوں اور زائرین و عازمین حج کی دلچسپی کا مرکز رہےگا۔
تازہ اعلان کے مطابق سعودی میوزیم اتھارٹی کا کہنا ہے کہ جدہ کے مرکزی تاریخی علاقے میں “ریڈ سی میوزیم” مکمل ہوچکا ہے جس کا افتتاح 6 دسمبر 2025 کو کیا جائے گا۔عروس البلاد جدہ پرانے تاریخی علاقے کے قدیم مقامات اقوام متحدہ کی تعلیمی، سائنسی اور ثقافتی تنظیم یونیسکو کے عالمی ثقافتی ورثے کی فہرست میں شامل ہیں۔
عربی روزنامہ “عکاظ”کے مطابق وزیر ثقافت اور میوزیم اتھارٹی کے بورڈ آف ڈائریکٹر کے چیئرمین شہزادہ بدر بن عبداللہ بن فرحان آل سعود کا کہنا تھا کہ ریڈ سی میوزیم مملکت کے وژن 2030 سے مطابقت رکھتا ہے جو ہمارے قومی ورثے کے تحفظ اور ثقافت، فنون و تعلیم کے ذریعے معیار زندگی کو بہتر بناتے ہوئے لوگوں کی تخلیقی صلاحیتوں کو ابھارنے کے لیے مملکت کے عزم کی عکاسی کرتا ہے۔
بحرالاحمر میوزیز جدہ کے قدیم علاقے “باب النبط”میں بنایا گیا ہے جو کسی زمانے میں بندرگاہ کااہم حصہ مانا جاتا تھا جہاں عازمین بحری جہازوں سے دنیا کے مختلف ممالک سے جدہ پہنچا کرتے تھے۔میوزیم کو جدید انداز میں اس طرح تعمیر کیا گیا ہے کہ اس کی قدیمی ساخت اورشناخت برقرار رہے جو جدہ کا دروازے کے طورپر عہدِ رفتہ میں مشہور تھی۔
میوزیم میں ایک ہزار سے زائد آثار قدیمہ موجود ہیں جنہیں 23 ہالوں میں اس طرح رکھا گیا ہے کہ ان کے بارے میں مکمل تفصیلات سے زائرین آگاہ ہو سکیں۔
