یومِ دستور 2025ء — نئی نسل کو دستور ہند کی پاسداری اور قومی ذمہ داریوں کا شعور دینے مولانا مفتی ڈاکٹر حافظ محمد صابر پاشاہ قادری کا زور
حیدرآباد، 27 نومبر (پریس ریلیز)
یومِ دستور 2025ء — نئی نسل کو دستور ہند کی پاسداری اور قومی ذمہ داریوں کا شعور دینے پر زور
چیئرمین لینگویجز ڈویلپمنٹ آرگنائزیشن مولانا مفتی ڈاکٹر حافظ محمد صابر پاشاہ قادری نے
یومِ دستور 2025ء کی تقریب سے صدارتی خطاب کرتے ہوئے کہا کہ نئی نسل ملک و ملت کا تابناک مستقبل ہے اور ان پر ذمہ داری عائد ہوتی ہے کہ وہ اپنے اپنے میدان میں نمایاں کارکردگی دکھا کر ملک میں علم، اخلاق اور ترقی کی نئی روشنی پھیلائیں۔انہوں نے واضح کیا کہ 26 نومبر 1949ء وہ تاریخی دن ہے جس روز دستورِ ہند کو منظور کیا گیا، اور اسی مناسبت سے ہر سال ’’یومِ دستور‘‘ منایا جاتا ہے۔ یہ دن نہ صرف ہماری جمہوری شناخت کی یاد تازہ کرتا ہے بلکہ قوم کو اس کے بنیادی اصولوں سے وفاداری کا پیغام بھی دیتا ہے۔مولانا نے ڈیجیٹل اور ٹیکنالوجی کے اس دور—جس میں انٹرنیٹ، مشین لرننگ اور آرٹیفیشل انٹلیجنس بےحد تیزی سے ترقی کر رہے ہیں کے تناظر میں نئی نسل کو خصوصی پیغام دیتے ہوئے کہا کہ:
"جدید سائنسی اور تکنیکی ترقی کے باوجود طلبہ کیلئے فکری آزادی، شخصی وقار، ذمہ دارانہ فکر اور شائستہ اظہار نہایت ضروری ہے۔ علم کے ساتھ کردار کی تعمیر ہی حقیقی ترقی ہے۔”
صدر دفتر فروغِ لسانیات میں یومِ دستور بڑے جوش و جذبہ، وقار اور ملی حمیت کے ساتھ منایا گیا۔ پروگرام کا مرکزی نقطۂ توجہ دیباچۂ دستور ہند کی اجتماعی قرأت رہا، جس میں شرکاء نے بھرپور حصہ لیا۔مولانا صابر پاشاہ نے دستور کے بنیادی اصول — انصاف، آزادی، مساوات اور اخوت — پر روشنی ڈالتے ہوئے کہا کہ:”یومِ دستور محض ایک تقریب نہیں، بلکہ یہ ہماری جمہوری روح کی علامت ہے۔ نوجوانوں کی ذمہ داری ہے کہ وہ دستور کے اصولوں کو سمجھیں، ان پر عمل کریں اور اپنے وطن کی سالمیت و ترقی میں مثبت کردار ادا کریں۔”
تقریب کا اختتام اس عزم کے ساتھ ہوا کہ نئی نسل نہ صرف اپنے دستوری حقوق و فرائض سے واقف ہو بلکہ ہندوستان کی جمہوری وراثت کی محافظ بھی بنے، اور ملک کو انصاف، امن، مساوات اور ترقی کی شاہراہ پر مزید آگے بڑھائے۔
—
