نظام آباد ضلع میں 545 گرام پنچایتوں کے انتخابات کا 3 مرحلوں میں انعقاد
نظام آباد ضلع میں 545 گرام پنچایتوں کے انتخابات کا 3 مرحلوں میں انعقاد
پرُ امن و منصفانہ انتخابات کیلئے تمام تیاریاں مکمل۔ رائے دہندگان اپنے حق رائے دہی کا آزادانہ طور پر استعمال کریں
نظام آباد ضلع الیکشن آفیسر اور کلکٹر ٹی ونئے کرشنا ریڈی کی پریس کانفرنس
نظام آباد: 27/ نومبر(نیوز اینڈ ویوز میڈیا سرویس) نظام آباد ضلع الیکشن آفیسر اور کلکٹر ٹی ونئے کرشنا ریڈی نے ہر ووٹر سے خواہش کی کہ وہ گرام پنچایت انتخابات کے لیے تین مرحلوں میں ہونے والی رائے دہی میں حصہ لیں اور اپنے حق رائے دہی کا آزادانہ طور پر استعمال کریں۔انہوں نے کہا کہ تین مرحلوں میں ضلع کے 31 منڈلوں کے حدود میں 545 گرام پنچایتوں اور 5022 وارڈ نشستوں پر انتخابات کے انعقاد کے لیے ضروری انتظامات مکمل کئے گئے ہیں۔آج انٹیگریٹڈ ڈسٹرکٹ آفسز کمپلیکس کے کانفرنس ہال میں منعقدہ ایک پریس کانفرنس میں ضلع کلکٹر نے ایڈیشنل کلکٹر انکت کے ہمراہ گرام پنچایت انتخابات کے لئے کئے گئے انتظامات کے بارے میں تفصیلات سے اخباری نمائندوں کو واقف کروایا۔
انہوں نے کہا کہ عوام کو پرامن ماحول میں اپنے حق رائے دہی کے استعمال کو یقینی بنانے کے لیے تمام اقدامات روبہ عمل لائے گئے ہیں۔ضلع کلکٹر و الیکشن آفیسر ٹی ونئے کرشنا ریڈی نے کہا کہ پہلے مرحلے میں بودھن ڈیویژن کے 10 منڈلوں جن میں بودھن، چندور، کوٹگیر، موسرا، پوتنگل، رنجل، رودرور، سالورہ، ورنی،ایڑپلی کے ساتھ نظام آباد ریونیو ڈیویژن کے نوی پیٹ منڈل کے حدود میں 184 سرپنچ اور 1642 وارڈ نشستوں کیلئے انتخابات منعقد ہوں گے۔ آج سے پرچہ نامزدگی کا آغاز عمل میں آیا ہے۔ انہوں نے کہا کہ دوسرے مرحلہ نظام آباد ڈیویژن کے درپلی، ڈچپلی، اندلوائی، ماکلور، موپال، نظام آباد، سرکنڈہ کے ساتھ آرمور ڈیویژن کے جکران پلی منڈل کے حدود میں 196 گرام پنچایتوں 1760 وارڈ نشستوں کیلئے انتخابات منعقد ہوں گے
۔ تیسرے مرحلہ میں آرمور ڈیویژن کے آلور، آرمور، بالکنڈہ، بھیمگل، ڈونکیشور، کمر پلی، مینڈورہ، موڑتاڑ، موپکال، نندی پیٹ، ویلپور، ایر گٹلامنڈلوں کے حدود میں واقع 165 گرام پنچایتوں اور 1620 وارڈ نشستوں کیلئے انتخابات ہوں گے۔ انہوں نے بتایا کہ رائے دہی کیلئے تینوں ڈیویژنوں میں مجموعی طور پر 5553 پولنگ اسٹیشنس قائم کئے گئے ہیں۔
تاحال 28 منڈلوں کیلئے 5287 بیلٹ باکس روانہ کئے گئے۔ انتخابات کے پہلے مرحلے کے ختم ہونے کے بعد بیلٹ باکس بھیمگل، ڈونکیشور اور نندی پیٹ منڈلوں میں بھیجے جائیں گے۔ انہوں نے کہا کہ انتخابات کے انعقاد کے لیے ضروری پولنگ مواد کو تمام علاقوں تک پہنچانے کے لیے اقدامات کیے گئے ہیں۔ انہوں نے انکشاف کیا کہ انتخابی عملے کی تربیت مکمل کر لی گئی ہے اور دوبارہ تربیت کے لیے ضروری انتظامات کر لیے گئے ہیں۔ضلع کلکٹر ٹی ونئے کرشنا ریڈی نے کہا کہ ضلع میں 3,96,778 مرد ووٹر، 4,54,621 خواتین اور 18 دیگر زمروں کے ووٹرس شامل ہے۔ مجموعی طور پرووٹرس 8,51,417 ہے۔
انہوں نے مشورہ دیا کہ ہر ووٹر ووٹ دے اور جمہوریت کی اہمیت کا اظہار کرے۔ انہوں نے کہا کہ ہر ووٹراپنے حق رائے دہی کا استعمال کریں۔ رائے دہی کے فیصد میں اضافہ کیلئے تمام گرام پنچایتوں میں شعور بیداری پروگرام کا انعقاد عمل میں لایا جارہا ہے۔ ضلع کلکٹر نے کہا کہ رائے دہی سے قبل بی ایل او کی قیادت میں عملہ کے ذریعہ ووٹر سلپس کی تقسیم کی جائے گی۔ انہوں نے کہا کہ ضلع میں 102 زونز بنائے گئے ہیں اور 111 زونل افسران کو تعینات کیا گیا ہے۔ انہوں نے کہا کہ مسائل سے دوچار اور انتہائی مسائل سے دوچار پولنگ اسٹیشنوں پر اضافی سکیورٹی اور دیگر انتظامات کئے جا رہے ہیں۔ انہوں نے کہا کہ جن پولنگ مراکز میں ویب کاسٹنگ ممکن نہیں وہاں مائیکرو آبزرور تعینات کیے جائیں گے، 197 مائیکرو آبزرور تعینات کیے جا رہے ہیں۔ انہوں نے کہا کہ کلکٹریٹ میں ایک کنٹرول روم قائم کیا گیا ہے تاکہ کوئی بھی انتخابات سے متعلق معلومات حاصل کر سکے اور شکایت درج کر سکے۔
انہوں نے کہا کہ ریاستی الیکشن کمیشن کی طرف سے مقرر کردہ عام انتخابات کے مبصرین اور اخراجات کے مبصرین بھی ضلع پہنچ چکے ہیں، اور مبصرین انتخابات کے انعقاد پر گہری نظر رکھیں گے۔ کلکٹر نے کہا کہ لالچ کا کوئی موقع نہ ملنے پر نگرانی تیز کردی گئی ہے اور ایف ایس ٹی ٹیموں کے ساتھ ساتھ ہر منڈل میں ایس ایس ٹی سرویلنس ٹیموں کا تقرر کیا گیا ہے۔ انہوں نے کہا کہ وہ اس بات کو یقینی بنانے کے لیے نگرانی کر رہے ہیں کہ انتخابی ضابطہ اخلاق پر بغیر کسی خلاف ورزی کے صحیح طریقے سے عمل درآمد کیا جائے
۔ ضلع کلکٹر نے نشاندہی کی کہ ریاستی الیکشن کمیشن سے متفقہ انتخابات کے سلسلے میں رہنما خطوط جاری کیے جانے ہیں، لیکن کسی کو بھی متفقہ انتخابات کے لیے زبردستی کا طریقہ اختیار نہیں کرنا چاہیے۔ انہوں نے کہا کہ ایسے افراد کے خلاف قانونی کارروائی کی جائے گی۔ کلکٹر نے سماج کے تمام طبقات سے خواہش کی کہ وہ ضلع نظام آباد کے ساتھ تعاون کریں تاکہ انتخابات پرُ امن ماحول میں منعقد ہوں۔ اس موقع پر ڈسٹرکٹ پنچایت آفیسر سرینواس راؤ و دیگر موجود تھے۔
