کویتا نے علیحدہ طور پر عوامی جدوجہد کا آغاز کیا ہے  حقائق کے برملا اظہار پر الزامات عائد کرنے کی شدید مذمت تلنگانہ جاگروتی کے قائدین کی پریس کانفرنس 

کویتا نے علیحدہ طور پر عوامی جدوجہد کا آغاز کیا ہے

حقائق کے برملا اظہار پر الزامات عائد کرنے کی شدید مذمت

تلنگانہ جاگروتی کے قائدین کی پریس کانفرنس

 

تلنگانہ جاگروتی کے لیڈرس نے آج بنجارہ ہلز میں واقع جاگروتی دفتر میں پریس کانفرنس سے خطاب کیا اور کہا کہ ریاست میں آبپاشی منصوبوں، خصوصاً کالیشورم پروجیکٹ سے متعلق حقائق، سابقہ حکومت کی بے ضابطگیوں اور بی آر ایس قائدین کی جانب سے پھیلائی جانے والی گمراہ کن باتوں کو تفصیل کے ساتھ عوام کے سامنے رکھا۔پی آر او نوین کمیرا نے بتایا کہ صدر تلنگانہ جاگروتی کلواکنٹلہ کویتا جب ”جاگروتی جنم باٹا“ پروگرام کے تحت اضلاع کا دورہ کررہی ہیں اس دوران عوام اپنے مسائل، زمینی حقائق اور سابقہ حکومت کی کوتاہیوں کو ان کے سامنے پیش کررہے ہیں، ان ہی عوامی مسائل کی بنیاد پر جاگروتی قائدین میڈیا کے سامنے حقائق بیان کررہے ہیں۔

 

نوین کمیرا نے واضح کیا کہ بی آر ایس کے بعض سابق وزراء مسلسل یہ دعویٰ کر رہے ہیں کہ کالیشورم پروجیکٹ کے ذریعہ نظام ساگر اور سری رام ساگر کو پانی فراہم کیا گیا، مگر یہ دعویٰ سراسر غلط ہے، کیونکہ ضلع نظام آباد اور کاما ریڈی میں کالیشورم کے تحت منظور شدہ ایک ایکڑ زمین کو بھی پانی نہیں پہنچا۔ پراجیکٹ کے مختلف پیکیجوں کی لاگت میں بے تحاشہ اضافہ، قواعد کی خلاف ورزی اور کنٹراکٹرس کو فائدہ پہنچانے کی نیت سے غیر ضروری اخراجات وہ حقائق ہیں جنہیں سابقہ حکومت چھپاتی رہی ہے

 

۔تلنگانہ جاگروتی کے ورکنگ پریسیڈنٹ ایل۔ روپ سنگھ نے کہا کہ کویتا کے جنم باٹا پروگرام میں عوام مختلف مقامی مسائل اور سابقہ بی آر ایس قائدین کی زیادتیوں کو بیان کر رہے ہیں، مگر ان حقائق کا سامنا کرنے کے بجائے سابقہ وزراء، خصوصاً پرشانت ریڈی اور جیون ریڈی، حقائق کو توڑ مروڑ پیش کرتے ہوئے غلط بیانی کر رہے ہیں۔ انہوں نے کہا کہ بی آر ایس نے اپنی دس سالہ حکومت میں نظام آباد پارلیمانی حلقہ کو مکمل طور پر نظرانداز کیا، مگر اب وہی قائدین کویتا کے عوامی سوالات کا سامنا نہیں کر پا رہےہیں ۔ روپ سنگھ نے یہ بھی بتایا کہ پارٹی کے اندرونی معاملات میں بھی کویتا کے ساتھ ناانصافیاں ہوئیں، حتیٰ کہ ان کی تحریری شکایات بھی لیک کر دی گئیں، جس کے بعد کویتا نے اپنی علیحدہ عوامی جدوجہد کا راستہ اختیار کیا۔

 

جاگروتی اسٹیٹ سکریٹری سری کانت گوڑ نے سابق وزیر ویمولا پرشانت ریڈی پر شدید تنقید کرتے ہوئے کہا کہ وہ خود بے شمار بدعنوانیوں، غیر قانونی ریت مافیا، ناقص تعمیرات اور اختیارات کے غلط استعمال میں ملوث رہے، اب عوام کا دھیان بھٹکانے کے لئے بے بنیاد الزامات عائد کررہے ہیں۔ سری کانت گوڑ نے یہ بھی کہا کہ بی آر ایس کی شکست کی اصل وجہ خود اسی پارٹی کے وزراء اور ایم ایل ایز کی نااہلی، بدعنوانی اور باہمی سازشیں تھیں، جنہیں آج بھی قبول کرنے کے بجائے کویتا پر الزام تراشی کی جا رہی ہے۔ انہوں نے چیلنج کیا کہ اگر پرشانت ریڈی میں ہمت ہے تو وہ امبیڈکر چوک پر آکر بدعنوانیوں پر کھلی بحث کریں۔

 

پریس کانفرنس میں جاگروتی کارکنان نے کہا کہ بی آر ایس اور کانگریس دونوں نے بی سی ریزرویشن کے معاملہ پر عوام کو دھوکہ دیا ہے، اسی لئے کلواکنٹلہ کویتا بی سی برادری کے آئینی حقوق کے لئے جدوجہد جاری رکھے ہوئے ہیں۔

 

انہیں بدنام کرنے کی کسی بھی کوشش کا جاگروتی بھرپور جواب دے گی۔جاگروتی قائدین نے واضح کیا کہ کلواکنٹلہ کویتا کی عوامی جدوجہد اور دوروں سے بوکھلاہٹ کے شکار بی آر ایس قائدین کی غلط معلومات اور پروپیگنڈہ کے جواب میں یہ پریس کانفرنس ضروری تھی، تاکہ عوام کے سامنے سچائی رکھی جا سکے۔