شعبہ عربی محکمہ تعلیم کی جانب سے سبکدوش اساتذہ کا شاندار اعزاز،ڈاکٹرحافظ محمد صابر پاشاہ قادری کا خطاب
شعبہ عربی محکمہ تعلیم کی جانب سے سبکدوش اساتذہ کا شاندار اعزاز،ڈاکٹرحافظ محمد صابر پاشاہ قادری کا خطاب
مولانا مفتی ڈاکٹر حافظ محمد صابر پاشاہ قادری (شعبہ عربی محکمہ تعلیم حکومت تلنگانہ)نے آج 29 نومبر کو ایک خصوصی نشست سے خطاب کرتے ہوئے برسرِ خدمت حضرات خصوصاً اساتذۂ کرام کی شاندار اور ناقابلِ فراموش خدمات کا اعتراف کرتے ہوئے فرمایا کہ استاد کسی بھی معاشرے کی تعمیر و تشکیل میں ریڑھ کی ہڈی کی حیثیت رکھتا ہے۔ آج جن معزز اساتذہ نے اپنی طویل اور بابرکت خدمات مکمل کر کے سبکدوشی کا مرحلہ عبور کیا ہے، وہ نہ صرف ادارے بلکہ پوری قوم کا سرمایہ اور عظیم اثاثہ ہیں۔
انہوں نے کہا کہ اساتذہ کرام نے اپنی پیشہ ورانہ زندگی میں جس خلوص، ایثار، محنت، دیانت اور حوصلے کا مظاہرہ کیا وہ آنے والی نسلوں کے لیے مشعلِ راہ ہے۔ اساتذہ کے ایک ایک لمحے کی محنت نے ہزاروں طلبہ کی زندگیاں سنواریں، ان کو علم، تہذیب، کردار اور اخلاق کی ایسی بنیاد فراہم کی جو ہمیشہ باقی رہنے والی ہے۔
مولانا ڈاکٹر صابر پاشاہ قادری نے کہا کہ اساتذہ کرام بالخصوص وہ بزرگ اساتذہ جو آج سبکدوش ہو رہے ہیں، انہوں نے نہ صرف تدریس بلکہ طلبہ کی ذہنی، اخلاقی، سماجی اور روحانی تربیت میں بھی ناقابلِ فراموش کردار ادا کیا ہے۔ ان بزرگوں کے چہرے پر عاجزی، زبان پر نرمی اور دل میں طلبہ کی خیر خواہی ہمیشہ نمایاں رہی۔ ان کی محنت کی بدولت ادارے نے ترقی و کامیابی کے وہ مراحل طے کیے جو ایک مضبوط تعلیمی بنیاد کی علامت ہیں۔
انہوں نے کہا کہ ایک استاد صرف پڑھاتا نہیں بلکہ نسلوں کو بناتا اور مستقبل سنوارتا ہے۔ سبکدوش ہونے والے اساتذہ نے کبھی کسی مشکل کو رکاوٹ نہیں سمجھا، بلکہ اخلاص مندی کے ساتھ علم کی شمع کو جلائے رکھا۔ انہوں نے ہر دور میں مثالی تدریسی کردار ادا کیا جس پر ادارہ ہمیشہ فخر کرتا رہے گا۔
مولانا ڈاکٹر صابر پاشاہ قادری نے مزید کہا کہ ادارہ ان معزز اساتذہ کی خدمات کا ہمیشہ معترف رہے گا۔ ان کی تدریسی جدوجہد، ان کا تجربہ، ان کی رہنمائی اور نصائح آج بھی ہمارے لیے سرمایۂ افتخار ہیں۔ سبکدوشی کے باوجود ان کی عزت و وقار میں کوئی کمی نہیں آتی بلکہ وہ ادارے کے لیے ہمیشہ قابلِ احترام رہیں گے۔
انہوں نے اس امید کا اظہار کیا کہ سبکدوش ہونے والے معزز اساتذہ اپنی دعاؤں اور مشوروں سے آئندہ بھی ادارہ کو فیضیاب کرتے رہیں گے۔ ان کی علمی وراثت ہمیشہ موجود رہے گی اور ان کے شاگرد مختلف میدانوں میں ترقی اور کامیابی کے ذریعے ان کی محنت کا ثبوت دیتے رہیں گے۔
آخر میں مولانا ڈاکٹر صابر پاشاہ قادری نے سبکدوش ہونے والے معزز اساتذہ کے لیے صحت، عافیت، عمرِ دراز، عزت، سکون اور زندگی کے نئے مرحلے میں بے شمار کامیابیوں کی دعا کی۔ انہوں نے دعا کی کہ اللہ تعالیٰ ان کی خدمات کو قبول فرمائے اور انہیں دنیا و آخرت میں بہترین بدلہ عطا فرمائے۔
—
