بھینسہ میں ’’ہمسایہ حقوق ایکسپو‘‘؛ طلبہ کی ماڈلز و سرگرمیوں کے ذریعے پڑوسیوں کے حقوق پر شاندارپیشکش

بھینسہ 30/نومبر (نمائندہ افروزخان اسٹاف رپوٹر) ڈیسنٹ فنکشن ہال میں آج سی آئی او کے زیرِ اہتمام اور جماعت اسلامی ہند جانب سے جاری قومی سطح پر ’’ہمسایہ مہم‘‘ کے سلسلے میں ’’ہمسایہ حقوق ایکسپو‘‘ کا شاندار انعقاد عمل میں آیا

 

 

جس میں بھینسہ شہر کے مختلف اسکولوں کے طلبا و طالبات نے ہمسایہ کے حقوق کے موضوع پر متنوع سرگرمیوں، ماڈلز اور پریزنٹیشنز کے ساتھ بھرپور شرکت کی۔ پروگرام کا باضابطہ افتتاح امیرِ مقامی جماعت اسلامی ہند،شاخ بھینسہ مبین احمد فردوسی کے ہاتھوں انجام پایا۔

 

 

اس ایکسپو میں طلبہ و طالبات نے نہایت دلکش ماڈلز، چارٹس اور سرگرمیوں کے ذریعے اچھے پڑوسی کے اوصاف، باہمی تعاون، سماجی ہم آہنگی، اور نبی کریم ﷺ کی پڑوسیوں کے ساتھ حسنِ سلوک پر مبنی تعلیمات کو خوبصورت انداز سے پیش کیا۔ بچوں کے تیار کردہ ماڈلز میں ایثار، ہمدردی، پرامن معاشرت اور ایک مثالی اسلامی سماج کی جھلک نمایاں تھی۔ اس موقع پر امیرمقامی مبین احمد میڈیا سے مخاطب ہوتے ہوئے بتایا کہ ’’سایہ مہم‘‘ کا مقصد معاشرے میں پڑوسیوں کے درمیان

 

 

محبت، خیرخواہی، تعاون اور مثبت تعلقات کو فروغ دینا ہے تاکہ ہم سب ایک بہتر اور ہم آہنگ سماج کی تشکیل میں کردار ادا کرسکیں۔انہوں نے اس ایکسپو میں شریک ہونے والے تمام طلبا، اسکول مینجمنٹ اور اساتذہ سمیت شعبۂ خواتین کی کثیر تعداد کی شرکت کا خیرمقدم کیا اور بچوں کی عمدہ تیاری اور فعال شرکت پر تمام اسکولوں کا خصوصی شکریہ ادا کیا۔ انہوں نے بتایا کہ جماعت اسلامی ہند کی جانب سے پورے ہندوستان کی سطح پر پڑوسیوں کے

 

 

حقوق کے حوالے سے دس روزہ ’’سایہ مہم‘‘ جاری ہے، جس کے تحت مختلف بامقصد پروگرام منعقد کیے جارہے ہیں، جن میں سی آئی او کے تحت یہ ایکسپو بھی شامل ہے۔انہوں نے مزید کہا کہ اسلامی معاشرے کی تعمیر میں پڑوسی بنیادی کردار ادا کرتے ہیں، مگر آج معمولی باتوں کی وجہ سے پڑوسیوں کے تعلقات متاثر ہورہے ہیں، خاص طور پر باہمی احترام میں کمی دیکھی جا رہی ہے، جب کہ اسلام میں نبی کریم ﷺ کی متعدد احادیث پڑوسیوں کے ساتھ حسنِ معاملات اور مضبوط معاشرتی تعلقات کی اہمیت واضح کرتی ہیں۔ انہوں نے زور دیتے ہوئے کہا کہ اگر ہم تعلیماتِ نبوی ﷺ پر عمل کریں تو معاشرے میں محبت، امن اور بھائی چارہ ازخود پروان چڑھ سکتا ہے۔

 

 

اس موقع پرالیاس احمدراحل رکن جماعت.محمدحفیظ خان رکن جماعت.محمداشرف علی رکن جماعت کےعلاوہ جی آئی او کے ممبران ودیگرموجودتھے.