مکہ مکرمہ اور مدینہ منورہ کے ہوٹلوں کے کرایوں میں دسمبر کےلیے 40 فیصد اضافہ
ریاض ۔ کے این واصف
مملکت کے مقدس شہرون میں زائرین کی آمد میں اضافہ کے ایام کے لحاظ ہوٹل رومز کے کرایوں میں تبدیلی کی جاتی ہے۔ تازہ اطلاع کے مطابق خلیجی ملکوں میں ہونے والی دسمبر کی تعطیلات کے باعث مکہ مکرمہ اورمدینہ منورہ میں ہوٹلوں کے کرایوں میں اضافہ ریکارڈ کیا جانے لگا۔
سبق کے مطابق ہوٹلنگ سیکٹر سے تعلق رکھنے والوں کا کہنا ہے حرمین شریفین (مکہ مکرمہ اور مدینہ منورہ) کے مرکزی علاقوں میں موجود ہوٹلوں کے کرایوں میں دسمبر کا آغاز ہوتے ہی نومبر کے مقابلے میں 40 فیصد اضافہ ہو گیا ہے جس کی بنیادی وجہ خلیجی فیملز کی جانب سے ایڈوانس بکنگ ہے۔
دونوں مقدس شہروں میں مرکزی علاقے کے باہر موجود ہوٹلوں کے کرایوں میں بھی اضافہ ہوا تاہم اس کا تناسب نومبر کے مہینے کے مقابلے میں 15 سے 20 فیصد ہے۔ہوٹلنگ کے شعبے سے متعلق ماہرین کا کہنا تھا کہ قطر، بحرین اور امارات میں نیشنل ڈے اور اسکولوں کی تعطیلات دسمبر میں آئی ہیں۔
سیکڑوں خلیجی شہری اور وہاں مقیم غیرملکیوں نے عمرہ و زیارت کا ارادہ کرتے ہوئے ہوٹلوں میں ایڈوانس بکنگ کی جس کا اثرا ہوٹلوں کے کرایوں میں اضافے کی صورت میں سامنے آیا۔ خلیجی ملکوں میں دسمبر کے پہلے ہفتے کی تعطیلات کا شیڈول جاری ہوتے ہی مملکت کے دونوں مقدس شہروں میں موجود ہوٹلوں کی بکنگ 100 فیصد مکمل ہو چکی ہے۔
ماہرین کا خیال ہے ہوٹلوں کے کرایوں میں اضافہ رواں ماہ کے نصف تک رہنے کا امکان ہے جس کے بعد مرحلہ وار اس میں کمی ہوگی تاہم عمرہ سیزن میں زائرین کی بڑی تعداد کی آمد کے ساتھ ہی ایک بار پھر کرایوں میں اضافہ ہوجائے گا۔
