بی جے پی سابق رکن اسمبلی کلدیپ سنگھ سینگر کی ضمانت کے خلاف سی بی آئی سپریم کورٹ سے رجوع

نئی دہلی ۔مرکزی تفتیشی بیورو (سی بی آئی) نے اناؤ عصمت دری کیس میں سابق اتر پردیش ایم ایل اے کلدیپ سنگھ سینگر کو دہلی ہائی کورٹ کی جانب سے دی گئی ضمانت اور عمر قید کی سزا معطل کرنے کے حکم کو چیلنج کرتے ہوئے سپریم کورٹ سے رجوع کیا ہے۔

 

سی بی آئی نے کل اعلیٰ عدالت کے فیصلے کے خلاف سپریم کورٹ میں خصوصی اجازت عرضی (SLP) دائر کی۔اس ہفتے کے اوائل میں دہلی ہائی کورٹ نے سینگر کی سزا کے خلاف اپیل زیرِ سماعت ہونے تک اس کی عمر قید کی سزا معطل کرنے اور مشروط ضمانت دینے کا حکم دیا تھا۔

 

کلدیپ سنگھ سینگر کو 2019 میں ایک خصوصی سی بی آئی عدالت نے اتر پردیش کے اناؤ عصمت دری کیس میں مجرم قرار دیتے ہوئے عمر قید کی سزا اور 25 لاکھ روپے جرمانہ سنایا تھا۔ انہوں نے جنوری 2020 میں دہلی ہائی کورٹ میں سزا کے خلاف اپیل دائر کی تھی اور بعد میں مارچ 2022 میں سزا معطل کرنے کی درخواست دی تھی۔

 

ہائی کورٹ کے حکم کا جائزہ لینے کے بعد سی بی آئی نے اس معاملے میں سپریم کورٹ سے مداخلت کی درخواست کی ہے۔ اناؤ کیس کی متاثرہ لڑکی اور اس کے اہلِ خانہ نے سینگر کو ضمانت دیے جانے کے فیصلے کی سخت مخالفت کی ہے۔

 

اگرچہ عصمت دری کیس میں ضمانت کا حکم دیا گیا ہے، تاہم سابق رکن اسمبلی جیل میں ہی رہے گا کیونکہ وہ ایک اور سی بی آئی کیس میں قتل سے متعلق 10 سال کی سزا بھی کاٹ رہا ہے۔