آصف پاشاہ کی تعلیمی ملی خدمات نا قابل فراموش، کانگریس سے وفاداری مثالی۔تعزیتی جلسہ کا انعقاد ، سوانح حیات کی رسم اجرا، ڈاکیومنٹری کی نمائش ، مختلف شخصیات کا خراج
تصویر کا کیپشن۔جناب ایس اے ہدیٰ اور ڈاکٹر محمد یوسف اعظم میڈیا پلس آڈیٹوریم میں جناب آصف پاشاہ کے تعزیتی جلسے اور بایوگرافی کے رسم اجراءکی تقریب سے خطاب کرتے ہوئے۔ تصویر میں مرحوم کے فرزندان ظہور احمد ، آفاق تنویر، حسنی انجم صاحبزادی، جناب جے ایس افتخار، سید خالد شہباز اور سبیل
حیدرآباد2جنوری2026۔ جناب آصف پاشاہ اپنی تعلیمی ملی اور سماجی خدمات کے لیے ہمیشہ یاد رکھے جائیں گے، ان کا 60سالہ کیریر بے داغ رہااگرچہ کہ وہ 1972سے 1976تک ہی وزیر قانون رہے تاہم اگلے پچاس برس انہوں نے ملی تعلیمی خدمات کے ذریعے بے مثال خدمات انجام دیں۔
ان خیالات کا اظہار مختلف اہم شخصیات نے آصف پاشا مرحوم کی تعزیتی جلسہ میں کیا جو میڈیا پلس فاﺅنڈیشن کے زیر اہتمام میڈیا پلس آڈیٹوریم میں یکم جنوری کی شام منعقد ہواجس میں مرحوم کے دونو ں فرزندان ظہور احمد (آسٹریلیائ) آفاق تنویر، صاحبزادی حسنی انجم کے علاوہ عزیز و اقارب کی کثیر تعدادنے شرکت کی۔ جناب ایس اے ہدیٰ آئی پی ایس، ریٹائرڈ سابق ڈی جی پی نے کہا کہ نظام ٹرسٹ کے ٹرسٹی کی حیثیت سے انہیں جناب آصف پاشاہ سے ملاقات اور مختلف امور پر تبادلہ خیال کا موقع ملتا رہا۔
ان کی فراست اور بصیرت غیر معمولی تھی ۔ وہ دیانت دار نیک انسان تھے اور ان میں قوم و ملت کے لیے غیر معمولی تڑپ تھی۔ جناب ظہور احمد اور آفاق تنویر نے اپنے والد کی اوصاف حمیدہ کو بیان کیا ۔ ڈاکٹر محمد یوسف اعظم صدر نشین مسلم ایجوکیشنل سوسائٹی نے بتایا کہ ان کے والد ڈاکٹر محمد اعظم مرحوم آصف پاشاہ مرحوم کے ہم عصر تھے ۔ بچپن سے وہ آصف پاشاہ کی خدمات سے واقف ہیں اور ان کے ساتھ ملی سرگرمیوں میں بڑھ چڑھ کر حصہ لینے کا موقع ملا۔
جناب سید انیس الدین چیئر مین سہایتا ٹرسٹ نے مرحوم کی مختلف شعبہ حیات کا ذکر کیا۔ عثمان محمد خان نے آصف پاشاہ کوکانگریس سے وفاداری کی ایک مثال قرار دیا۔سید خالد شہباز کی آصف پاشاہ کے حیات و خدمات پر بنائی گئی ڈاکیومینٹری کی نمائش کی گئی اور ممتاز صحافی جناب جے ایس افتخار کی آصف پاشاہ پرانگریزی بایوگرافی NO REGRETSکی رسم اجراءانجام دی گئی۔ سینئر عمار احمد کی قرائت کلام پاک سے تقریب کا آغاز ہوا۔ سید خالد شہباز نے نظامت کے فرائض انجام دیے،
سید عامر حنیف اور مجاہد محی الدین نے شکریہ ادا کیا۔اس تقریب میں مختلف شعبہ حیات سے تعلق رکھنے والی اہم شخصیات نے شرکت کی جن میں ہندوستانی فٹ بال ٹیم کے سابق کپتان شبیر علی ، نواب رونق یار خان، افتخار حسین سابق جنرل منیجر محمود سعید پرفیومس سعودی عرب، ڈاکٹر سکندر علی خان لودھی، عزیز احمد، نعیم شریف اورڈاکٹر عذرا قابل ذکر ہیں۔
