چینی مانجہ سے خاتون شدید زخمی ؛ کافی خون بہہ گیا — تلنگانہ کے میدک ضلع میں افسوسناک واقعہ
میدک، 14 جنوری ( حافظ فصیح الدین) تلنگانہ کے میدک ضلع میں چینی مانجہ کے استعمال کے سبب ایک افسوسناک حادثہ پیش آیا، جس میں ایک خاتون شدید زخمی ہو گئیں۔ یہ واقعہ اتوار کے روز چیگونٹہ منڈل کے مرکز میں اس وقت پیش آیا جب خاتون ایک رشتہ دار کی انتکِریا میں شرکت کے بعد واپس لوٹ رہی تھیں۔
مقامی ذرائع کے مطابق زخمی خاتون کی شناخت شیری مانمّا (عمر تقریباً 48 سال) کے طور پر ہوئی ہے، جو چھوٹا شنکرام پیٹ منڈل کے چندم پیٹ گاؤں کی رہائشی ہیں۔ وہ ماسائی پیٹ منڈل کے چٹلا نرسم پلی گاؤں میں ایک رشتہ دار کی انتکِریا میں شریک تھیں۔
واپسی کے دوران چیگونٹہ منڈل مرکز سے گزرتے وقت اچانک آسمان میں اڑتی پتنگ کا چینی مانجھے والا دھاگا ان کی ٹانگوں سے ٹکرا گیا۔ تیز اور نوکیلا مانجہ دونوں ٹانگوں میں بری طرح الجھ گیا، جس کے نتیجے میں انہیں گہرے زخم آئے اور شدید خون بہنے لگا۔ حادثے کے باعث وہ کچھ دیر کے لیے چلنے پھرنے سے بھی قاصر ہو گئیں۔
واقعہ دیکھ کر مقامی افراد فوری مدد کے لیے آگے آئے اور فوراً 108 ایمبولینس سروس کو اطلاع دی۔ ایمبولینس کے پہنچنے پر خاتون کو ابتدائی طبی امداد دی گئی اور بعد ازاں میدک کے سرکاری اسپتال منتقل کیا گیا، جہاں ڈاکٹروں کی نگرانی میں علاج جاری ہے۔ ڈاکٹروں کے مطابق بروقت طبی امداد نہ ملتی تو صورتِ حال مزید سنگین ہو سکتی تھی۔
حادثے کے بعد علاقے میں تشویش پائی جا رہی ہے۔ عوام نے چینی مانجہ کے بے لگام استعمال پر سخت ناراضگی ظاہر کرتے ہوئے انتظامیہ سے مطالبہ کیا ہے کہ چائنا مانجا کی فروخت اور استعمال پر عائد پابندیوں کو مؤثر طور پر نافذ کیا جائے۔ واضح رہے کہ چینی مانجہ انسانوں کے ساتھ ساتھ پرندوں اور جانوروں کے لیے بھی نہایت خطرناک ثابت ہو رہا ہے اور ماضی میں بھی اس کے باعث کئی حادثات پیش آ چکے ہیں۔
عوامی حلقوں نے اپیل کی ہے کہ تہواروں اور خاص مواقع پر پتنگ بازی کے دوران حفاظتی اصولوں کی پابندی کی جائے اور والدین، نوجوانوں اور دکانداروں سمیت سبھی لوگ اس مہلک دھاگے کے استعمال سے گریز کریں تاکہ قیمتی جانوں کو بچایا جا سکے۔
