“طویق اسکلپچر 2026 کا آغاز” 18 ملکوں کے 25 آرٹسٹ شریک۔ 22 فروری تک جاری
کے این واصف
فنون لطیفہ کے فروغ کے سلسلہ میں ایک اہم قدم۔ ریاض رائل کمیشن اور ریاض آرٹ پروگرام کے تحت طویق اسکلپچر سمپوزیم کے ساتویں ایڈیشن کا آغاز ہو گیا ہے جس میں 18 ملکوں کے 25 آرٹسٹ شریک ہیں جبکہ مملکت سے دو آرٹسٹ شامل ہیں۔
مملکت کی خبر رساں ایجنسی “ایس پی اے” کے مطابق ریاض کی تحلیہ اسٹریٹ پر یہ سمپوزیم ’ٹریسز آف واٹ ول بی‘ کی تھیم کے ساتھ 22 فروری 2026 تک جاری رہے گا۔ اس سال کے ایڈیشن میں مجسمہ سازی کو دو زمروں میں تقسیم کیا گیا ہے، پہلا گرینائٹ کے استعمال کرتے ہوئے اس میں اسٹینلس اسٹیل کی آمیزش اور دوسرا ری سائیکل شدہ دھاتوں کے ذریعے مجسمہ سازی میں جدت پیدا کرنا۔
تیار کیے جانے والے فن پارے ریاض آرٹ کی مستقل کلیکشن کا حصہ بن جائیں گے اور انہیں شہر کے اہم مقامات یا چوراہوں پر نصب کیا جائے۔ یاد رہے کہ طویق مجسمہ سازی کے ساتویں ایڈیشن کے لیے 590 فنکاروں نے شرکت کی درخواست دی تھی جبکہ اس فن کے ماہرین اور ججوں کا پینل 25 افراد پر مشتمل ہے۔
2019 میں شروع ہونے والے طویق سمپوزیم نے اب تک 150 سے زیادہ فنکاروں کی میزبانی کی ہے۔
