ضلع نظام آباد میں ریت کی غیر قانونی اسمگلنگ روکنے کے لیے سالورہ میں چیک پوسٹ قائم

ضلع نظام آباد میں ریت کی غیر قانونی اسمگلنگ روکنے کے لیے سالورہ میں چیک پوسٹ قائم

ٹی جی ایم ڈی سی منیجنگ ڈائریکٹر بھاویش مشرا نے ضلع کلکٹر ایلا ترپاٹھی کے ساتھ افتتاح کیا

 

نظام آباد، 7 مارچ (اردو لیکس): تلنگانہ اسٹیٹ منرل ڈیولپمنٹ کارپوریشن نے پڑوسی ریاستوں سے ریت کی غیر قانونی نقل و حمل کو روکنے کے لیے سخت اقدامات کرتے ہوئے ضلع نظام آباد کی سرحد پر واقع سالورہ میں ایک بین ریاستی چیک پوسٹ قائم کی ہے۔ اس چیک پوسٹ کا افتتاح کارپوریشن کے منیجنگ ڈائریکٹر بھاویش مشرا نے ضلع کلکٹر ایلا ترپاٹھی کے ہمراہ کیا۔ چیک پوسٹ پر ویئنگ مشین کے ذریعے ریت سے لدی گاڑیوں کی جانچ کے انتظامات کیے گئے ہیں۔

 

اس موقع پر بھاویش مشرا نے بتایا کہ اس چیک پوسٹ کے قیام سے ریت کی غیر قانونی نقل و حمل کے ساتھ ساتھ اوورلوڈنگ کو بھی روکا جا سکے گا۔ انہوں نے کہا کہ آن لائن بکنگ کے ذریعے قواعد کے مطابق مہاراشٹرا سے محدود مقدار میں ریت کی نقل و حمل کی اجازت ہوگی، تاہم سالورہ چیک پوسٹ پر ہر گاڑی کی مکمل جانچ کی جائے گی۔

 

انہوں نے مزید کہا کہ پہلے چیک پوسٹ نہ ہونے کی وجہ سے ریت کی نقل و حمل میں کئی بے ضابطگیاں سامنے آ رہی تھیں۔ ضلع انتظامیہ کے تعاون سے سرحدی علاقے میں یہ خصوصی چیک پوسٹ قائم کی گئی ہے جس سے نہ صرف غیر قانونی اسمگلنگ پر قابو پایا جا سکے گا بلکہ حکومت تلنگانہ کو آمدنی بھی حاصل ہوگی۔ اس کے علاوہ اوورلوڈنگ کو روکنے سے سڑکوں کو نقصان سے بچایا جا سکے گا اور حادثات میں بھی کمی آئے گی۔

 

بھاویش مشرا نے کہا کہ مانجرا دریا میں ریت کی کان کنی کے سلسلے میں سرحدی مسائل سے بچنے کے لیے جدید ٹیکنالوجی کی مدد سے حدود کا واضح تعین کیا گیا ہے۔ انہوں نے بتایا کہ چیف منسٹر اے ریونت ریڈی کی ہدایت پر حکومت ریت کی غیر قانونی نقل و حمل کے مسئلے پر خصوصی توجہ دے رہی ہے اور شفافیت کے لیے آن لائن بکنگ سسٹم متعارف کرایا گیا ہے، جو نظام آباد سمیت چار اضلاع میں تجرباتی طور پر نافذ کیا جا رہا ہے۔ اس موقع پر مائننگ اے ڈی سنجے، لینڈ اینڈ سروے اے ڈی اشوک اور دیگر مقامی عہدیدار بھی موجود تھے۔