دو ہفتوں میں سونے کی قیمت میں 10 ہزار روپے کی کمی

ملک میں سونا اور چاندی کی قیمتوں میں مسلسل گراوٹ کا رجحان برقرار ہے۔ پچھلے دو ہفتوں کے دوران ان قیمتی دھاتوں کی چمک ماند پڑ گئی ہے، اور معمولی اتار چڑھاؤ کے باوجود مجموعی طور پر دام نیچے ہی جا رہے ہیں۔ ماہرین کے مطابق اس کمی نے خریداروں کے لیے ایک بہتر موقع پیدا کیا ہے کہ وہ تازہ نرخوں پر غور کر کے ہی خریداری یا سرمایہ کاری کا فیصلہ کریں۔

انڈین بلین جویلرز ایسوسی ایشن (IBJA) کے مطابق، 17 اکتوبر کو 10 گرام 24 کیرٹ سونا 1,30,874 روپے میں فروخت ہو رہا تھا، جبکہ جمعہ کے روز اس کی قیمت گھٹ کر 1,20,100 روپے رہ گئی۔ یعنی محض 14 دن میں سونا 10,774 روپے سستا ہو گیا۔ گزشتہ روز کے بند ہونے والے نرخ کے مقابلے میں بھی 570 روپے کی مزید کمی درج ہوئی ہے۔

ملٹی کموڈیٹی ایکسچینج (MCX) پر بھی گراوٹ کا یہی رجحان دیکھا جا رہا ہے۔ 17 اکتوبر کو دسمبر ایکسپائری والے سونے کا ریٹ 1,27,008 روپے فی 10 گرام تھا، جو اب گھٹ کر 1,21,038 روپے رہ گیا ہے۔ اس طرح، دو ہفتوں میں سونا تقریباً 5,970 روپے تک نیچے آ چکا ہے۔

ماہرین کا کہنا ہے کہ عالمی سطح پر سونے کی مانگ میں کمی اور ڈالر کی مضبوطی نے قیمتوں پر دباؤ بڑھا دیا ہے، تاہم موجودہ حالات خریداروں کے لیے سنہری موقع ثابت ہو سکتے ہیں۔