یو ٹیوب دیکھ کر ڈائیٹ پلان۔ دبلے ہونے کی کوشش میں لڑکے کی موت

نئی دہلی ۔وزن کم کرنے کے لیے غیر صحت بخش غذا کے اصولوں پر عمل کرنے کے نتیجے میں تمل ناڈو کا 17 سالہ نوجوان ہلاک ہو گیا۔

 

کولاشیل علاقے سے تعلق رکھنے والا شکتیشورَن مشتبہ حالات میں فوت ہوگیا۔ پولیس نے مقدمہ درج کر کے تفتیش شروع کی جس کے دوران انہیں معلوم ہوا کہ گزشتہ تین ماہ سے وہ مختلف یوٹیوب چینلز دیکھ کر ہوئے سخت ڈائٹ پلان پر عمل کر رہا تھا۔

 

نوجوان کے گھر والوں نے بتایا کہ وہ کسی بھی قسم کا ٹھوس کھانا کھائے بغیر صرف پانی اور پھلوں کا رس (جوس ڈائٹ) پی رہا تھا۔ ان کے مطابق شکتی شورَن نے یہ ڈائٹ ڈاکٹروں کے مشورے کے بغیر صرف یوٹیوب ویڈیوز میں دی گئی ہدایات کی بنیاد پر اپنائی تھی۔

 

اس دوران وہ وزن کم کرنے کے لیے مختلف گولیاں بھی لے رہا تھا اور ساتھ میں ورزش بھی کر رہا تھا۔جمعرات کو سانس لینے میں دشواری کے باعث وہ اچانک گھر میں گر پڑا۔ فوراً اسے ہاسپٹل لے جایا گیا، لیکن ڈاکٹروں نے بتایا کہ وہ پہلے ہی دم توڑ چکا تھا۔

 

پولیس کے مطابق نوجوان کی موت کی اصل وجہ جاننے کے لیے نعش کو پوسٹ مارٹم کے لیے بھیجا گیا ہے۔