خواتین ون ڈے ورلڈ کپ سیمی فائنل میں بھارت کی شاندار کامیابی، آسٹریلیا کو شکست دے کر فائنل میں داخلہ

خواتین ون ڈے ورلڈ کپ میں بھارت کی شاندار کامیابی، آسٹریلیا کو شکست دے کر فائنل میں داخلہ

 

خواتین ون ڈے ورلڈ کپ 2025 میں ٹیم انڈیا نے شاندار کارکردگی کا مظاہرہ کرتے ہوئے طاقتور آسٹریلیا کو سیمی فائنل میں 5 وکٹوں سے شکست دی۔

 

آسٹریلیا، جو لیگ مرحلے کے تمام میچ جیت کر پوائنٹس ٹیبل میں سرفہرست رہی، سیمی فائنل میں ٹیم انڈیا کے سامنے بے بس نظر آئی۔ پہلے بیٹنگ کرتے ہوئے آسٹریلوی ٹیم 49.5 اوورز میں 338 رنز بنا کر آؤٹ ہوگئی۔

 

مقررہ نشانہ کے تعاقب میں بھارتی خواتین نے شاندار بلے بازی کی اور 48.3 اوورز میں 5 وکٹوں کے نقصان پر میچ اپنے نام کر لیا۔ جمیما روڈریگز نے ناقابلِ شکست 127 رنز (134 گیندوں پر 14 چوکے) بنا کر ٹیم کو جیت کی راہ دکھائی۔ کپتان ہرمن پریت کور نے بھی 89 رنز (88 گیندوں پر 10 چوکے اور 2 چھکے) کی شاندار اننگز کھیلی۔ دونوں کے درمیان تیسری وکٹ کے لیے 167 رنز کی زبردست شراکت رہی۔

 

دیپتی شرما نے 24، رچا گھوش نے 26، سمرتی مندھانا نے 24، امانجوت کور نے 15 ناٹ آؤٹ اور شیفالی ورما نے 10 رنز بنائے۔ آسٹریلیا کی جانب سے انابیل سدھرلینڈ اور کم گارتھ نے دو دو وکٹیں حاصل کیں۔

 

یہ تیسری بار ہے کہ بھارتی خواتین ٹیم ورلڈ کپ کے فائنل میں پہنچی ہے۔ اس سے قبل 2005 اور 2017 میں بھی ٹیم انڈیا فائنل میں پہنچی تھی مگر خطاب حاصل نہیں کر سکی۔

 

اب بھارت 2 نومبر کو فائنل میں جنوبی افریقہ سے ٹکرائے گا — اور چونکہ دونوں ٹیمیں اب تک عالمی چیمپئن نہیں بنیں، اس بار ورلڈ کپ میں ایک نیا فاتح دیکھنے کو ملے گا۔