ویمنس پریمیئر لیگ کی میگا نیلامی —  تلنگانہ کے ضلع کریم نگر کی آل راؤنڈر شیکھا پانڈے نے جیک پاٹ مار لیا

ویمنس پریمیئر لیگ (WPL) کے میگا نیلام میں بڑی کامیابی —  تلنگانہ کے ضلع کریم نگر کی آل راؤنڈر شیکھا پانڈے نے جیک پاٹ مار لیا

 

ویمنس پریمیئر لیگ کے میگا نیلامی میں تلنگانہ کے ضلع کریم نگر کی کھلاڑی اور ہندوستانی اسٹار آل راؤنڈر شیکھا پانڈے کی بولی 2 کروڑ 40 لاکھ روپے تک پہنچ گئی۔ یو پی واریرز نے شیکھا پانڈے کو 2.4 کروڑ روپے کی خطیر رقم میں خرید کر اپنے اسکواڈ کا حصہ بنا لیا۔ شیکھا پانڈے صرف 40 لاکھ روپے کے بیس پرائس کے ساتھ نیلامی میں آئیں، مگر آکشن کے دوران متعدد فرنچائزیز نے ان کے لئے سخت مقابلہ کیا، اور آخرکار یو پی واریرز نے سب کو پیچھے چھوڑتے ہوئے انہیں 2.4 کروڑ میں حاصل کر لیا۔

 

شیکھا سبھاش پانڈے 12 مئی 1989 کو ضلع کریم نگر کے رام گنڈم میں پیدا ہوئیں۔ بچپن سے ہی کرکٹ ان کا جنون تھا۔ 15 سال کی عمر میں انہوں نے قومی سطح پر گوا کی نمائندگی کی۔ کھیل کے ساتھ ساتھ تعلیم میں بھی شیکھا ہمیشہ نمایاں رہیں۔ سی بی ایس ای دسویں جماعت کے امتحانات میں ٹاپر رہیں۔ ایک جانب تعلیم اور دوسری جانب کرکٹ کی پریکٹس — دونوں کو انہوں نے بیک وقت جاری رکھا۔

 

انہوں نے گوا کالج آف انجینئرنگ سے انجینئرنگ کی ڈگری مکمل کی۔ گریجویشن کے بعد انہیں مختلف مشہور ایم این سی کمپنیوں سے بھاری تنخواہ پر ملازمت کی پیشکشیں ہوئیں، مگر کرکٹ سے محبت کے باعث انہوں نے سب آفرز مسترد کر دیں۔

 

بین الاقوامی سطح پر ہندوستان کی نمائندگی کا خواب پورا کرنے کے لئے انہوں نے پوری توجہ کرکٹ پر مرکوز کر دی۔ اسی سفر کے دوران 2011 میں شیکھا پانڈے نے انڈین ایئر فورس (IAF) میں ملازمت حاصل کی اور ایئر ٹریفک کنٹرولر سے ترقی کرتے ہوئے اسکواڈرن لیڈر کے عہدے تک پہنچیں۔ ملازمت کے باوجود انہوں نے کرکٹ کو ترک نہیں کیا۔

 

بالآخر 2014 میں شیکھا پانڈے کی زندگی کی خواہش پوری ہوئی اور وہ ہندوستانی خواتین کرکٹ ٹیم میں منتخب ہوئیں۔ انہوں نے ایئر فورس کی نوکری چھوڑ کر پوری طرح کرکٹ کیریئر شروع کیا۔ 2014 میں ہی انہوں نے ٹیسٹ، ون ڈے اور ٹی ٹوئنٹی — تینوں فارمیٹس میں ہندوستان کی نمائندگی کرتے ہوئے انٹرنیشنل ڈیبیو کیا۔

 

رائٹ آرم میڈیم پیسر ہونے کے ساتھ ساتھ وہ مڈل آرڈر بیٹر کے طور پر بھی ٹیم کے لیے قابلِ قدر رہیں۔ 2020 کے آئی سی سی ویمنز ٹی20 ورلڈ کپ میں بھی وہ بھارتی اسکواڈ کا حصہ رہیں۔

 

ویمنس پریمیئر لیگ کے پہلے سیزن میں وہ دہلی کیپیٹلز کی جانب سے کھیلیں، جبکہ 2026 سیزن کے لیے میگا آکشن میں انہیں 2.4 کروڑ روپے کی خطیر رقم میں یو پی واریرز نے حاصل کر لیا۔ ملکی سطح کی کرکٹ میں وہ تقریباً دو دہائیوں تک گوا کی نمائندگی کرتی رہیں اور اس کے بعد 2025-26 سیزن کے لئے بروڈا ٹیم میں شامل ہوئیں۔