کیا آپ اسکوٹی کے آگے بچوں کو کھڑا کرتے ہیں؟ تو خبردار رہیں کمشنر پولیس حیدرآباد کی وارننگ
حیدرآباد: موٹرسائیکلوں پر بچوں کو لے جانے والے والدین کے لیے حیدرآباد کے پولیس کمشنر سجنار نے اہم ہدایات جاری کی ہیں۔ خاص طور پر اسکوٹی کے اگلے حصے میں بچوں کو کھڑا کرنے سے پیدا ہونے والے جان لیوا خطرات کے بارے میں انہوں نے خبردار کیا ہے۔
اس سلسلے میں انہوں نے اتر پردیش کے مظفر نگر میں پیش آئے ایک افسوسناک واقعے کی ویڈیو سوشل میڈیا پلیٹ فارم ‘ایکس’ پر شیئر کی۔ سجنار نے کہا کہ جب گاڑی روکی جاتی ہے یا بچے اتر رہے ہوتے ہیں اگر وہ نادانستہ طور پر ایکسیلیریٹر گھما دیں تو یہ ایک سنگین حادثے کا سبب بن سکتا ہے۔
انہوں نے یاد دلایا کہ معمولی سی لاپرواہی بھی جان لیوا ثابت ہو سکتی ہے، اور حال ہی میں مظفر نگر میں پیش آیا واقعہ اس کی واضح مثال ہے۔
* گاڑی روکتے ہی فوراً انجن بند کر کے چابی نکالنے کی عادت ڈالیں۔
* بچوں کے اترتے وقت اچانک ایکسیلیریٹر نہ گھوم جائے، اس کے لیے بریک مضبوطی سے دبائے رکھیں۔
* گاڑی میں موجود “انجن کِل سوئچ” کا استعمال کریں تاکہ اس طرح کے حادثات کو روکا جا سکے۔
سجنار نے کہا "آپ کی حفاظت آپ کے اپنے ہاتھوں میں ہے۔ ہوشیار رہیں اور دوسروں کو بھی اس بارے میں آگاہ کریں۔”
