آپریشن کے بعد ڈاکٹرس مریض کے پاؤں میں سرجیکل بلیڈ بھول گئے
حیدرآباد ۔ ریاست آندھراپردیش کا کیناڈا کے تونی کے سرکاری ہاسپٹل میں ڈاکٹروں کی غفلت کا سنگین واقعہ سامنے آیا ہے۔ ایک نوجوان کے پاؤں کی سرجری کرنے والے ڈاکٹروں نے غلطی سے سرجیکل بلیڈ اندر ہی چھوڑ دیا اور ٹانکے لگا دیے۔
تونی منڈل کے ایس۔اناورم پنچایت حدود کے رام کرشنا نگر سے تعلق رکھنے والے چنّا نے ڈیڑھ سال پہلے وشاکھاپٹنم میں پاؤں کی چوٹ کی سرجری کروائی تھی۔ اُس وقت اس کے پاؤں میں اسٹیل راڈ اور پیچ (اسکرو) لگائے گئے تھے۔ حال ہی میں تکلیف بڑھنے پر وہ اسکرو نکلوانے کے لیے تونی ہاسپٹل آیا۔
ڈاکٹروں نے سرجری کرکے اسکرو تو نکال دیا لیکن اسی دوران استعمال ہونے والا بلیڈ پاؤں کے اندر ہی رہ گیا اور ڈاکٹروں نے ٹانکے لگا دیے۔ بعد میں ایکسرے میں یہ بات سامنے آئی تو متاثرہ نوجوان پریشان ہو کر دوبارہ ڈاکٹروں سے رجوع ہوا۔
جس کے بعد دوبارہ آپریشن کرکے وہ بلیڈ نکال دیا گیا۔فی الحال متاثرہ نوجوان ہاسپٹل میں زیر علاج ہے اور صحت یاب ہو رہا ہے۔
