جنگ میں 3 ہزار سے زائد شہری ہلاک – ایرانی حکومت کی جانب سے سرکاری اعداد و شمار جاری
ایران نے دعویٰ کیا ہے کہ گزشتہ تقریباً چالیس دنوں کے دوران امریکہ اور اسرائیل کی مشترکہ فضائی کارروائیوں میں 3,375 شہری ہلاک ہو چکے ہیں۔ ایرانی حکام کے مطابق جاں بحق ہونے والوں میں 2,875 مرد اور 500 خواتین شامل ہیں۔
ایران کے فارنزک میڈیسن ادارے کے سربراہ عباس مسجدی ارانی نے یہ اعداد و شمار جاری کرتے ہوئے صورتحال کو انتہائی تشویشناک قرار دیا۔ یہ اعداد و شمار ایسے وقت سامنے آئے ہیں جب امریکہ اور ایران کے درمیان پاکستان میں ہونے والے مذاکرات ناکام ہو گئے ہیں۔
دوسری جانب لبنان میں بھی اسرائیلی فوج کی جانب سے حزب اللہ کے ٹھکانوں کو نشانہ بناتے ہوئے شدید حملے جاری ہیں۔ اطلاعات کے مطابق ان حملوں میں اب تک تقریباً دو ہزار افراد ہلاک ہو چکے ہیں، جبکہ حالیہ دنوں میں ایک ہی دن میں لگ بھگ 300 افراد کی ہلاکت کی بھی خبر ہے۔
ذرائع کے مطابق امریکہ اور ایران کے درمیان ہونے والی حالیہ بات چیت میں لبنان پر جاری حملوں کا معاملہ بھی ایک اہم موضوع کے طور پر زیر بحث آیا۔
