پاکستانی جھنڈے والا آئل ٹینکر نشانہ، آبنائے ہرمز میں ایران کا میزائل حملہ، کشیدگی میں خطرناک اضافہ

ایران اور امریکہ-اسرائیل کشیدگی کے بیچ خلیج فارس میں حالات مزید سنگین ہو گئے ہیں۔ اطلاعات کے مطابق آبنائے ہرمز میں ایران کی پاسدارانِ انقلاب نے ایک آئل ٹینکر پر میزائل حملہ کر کے اسے تباہ کر دیا۔ بتایا جا رہا ہے کہ متاثرہ ٹینکر پاکستان کے جھنڈے کے ساتھ چل رہا تھا۔

 

ایرانی ذرائع کے مطابق ٹینکر نے ان کی ہدایات کی خلاف ورزی کرتے ہوئے آبنائے ہرمز میں داخل ہونے کی کوشش کی، جس کے نتیجے میں یہ کارروائی کی گئی۔ دوسری جانب کچھ رپورٹس میں دعویٰ کیا جا رہا ہے کہ پاکستان کے جھنڈے تلے تیل غیر قانونی طور پر امریکہ منتقل کیا جا رہا تھا، جس کے ردعمل میں یہ حملہ ہوا۔

 

واقعے کی ویڈیوز سوشل میڈیا پر وائرل ہو رہی ہیں، جن میں ٹینکر کو شعلوں کی لپیٹ میں دیکھا جا سکتا ہے، تاہم عملے کے جانی نقصان کے حوالے سے ابھی تک کوئی تصدیق نہیں ہوئی۔

 

واضح رہے کہ حالیہ کشیدگی کے بعد ایران نے آبنائے ہرمز پر سخت کنٹرول قائم کر رکھا ہے اور بغیر اجازت کسی بھی جہاز کے داخلے پر پابندی عائد کر دی ہے۔ اس صورتحال کے باعث عالمی تیل سپلائی متاثر ہوئی ہے اور بین الاقوامی مارکیٹ میں خام تیل کی قیمت 100 ڈالر فی بیرل سے تجاوز کر گئی ہے، جس سے عالمی معیشت پر بھی اثرات مرتب ہو رہے ہیں۔