ایران نے ہندوستانیوں کے لیے ویزا فری داخلہ ختم کرنے کا اعلان کر دیا

نئی دہلی ۔ایران نے اپنے ویزا قوانین میں اہم تبدیلی کا اعلان کرتے ہوئے کہا ہے کہ 22 نومبر 2025 کے بعد ہندوستانی شہریوں کو ویزا فری داخلہ فراہم نہیں کیا جائے گا۔ اس فیصلے کے بعد ہندوستانی وزارتِ خارجہ نے اپنے شہریوں کے لیے ایک اہم ایڈوائزری جاری کی ہے۔

 

 

وزارتِ خارجہ نے انکشاف کیا کہ حالیہ مہینوں میں متعدد شکایات موصول ہوئی ہیں جن میں ہندوستانی شہریوں کو فرضی ملازمتوں کے وعدوں یا تیسرے ممالک کے لیے سفر کے بہانے ایران لے جایا گیا۔ بدعنوان ایجنٹس مبینہ طور پر عام ہندوستانی پاسپورٹ رکھنے والوں کو دستیاب ویزا چھوٹ کا فائدہ اٹھا کر انہیں ایران جانے پر آمادہ کر رہے تھے۔

 

 

وزارت نے خبردار کیا کہ ایسے واقعات شہریوں کی سلامتی کے لیے خطرہ ہیں۔ وزارت نے شہریوں کو مشورہ دیا ہے کہ وہ بیرونِ ملک ملازمت ٹور یا دیگر پیشکشوں پر انتہائی احتیاط

 

 

سے غور کریں اور کسی بھی سفر سے قبل تمام قوانین اور سفری تقاضوں کی تصدیق لازمی کریں۔

 

ایران کی جانب سے ویزا فری داخلے کا خاتمہ دونوں ممالک کے درمیان موجودہ سفری ضابطوں میں ایک اہم تبدیلی تصور کی جا رہی ہے، جس کے مستقبل میں مزید اثرات مرتب ہو سکتے ہیں۔