اسرائیل پر ایران کا بیلسٹک میزائل حملہ، ایک درجن سے زائد مقامات پر میزائل گرنے کی اطلاع۔ 6 زخمی
نئی دہلی: اتوار کی دوپہر ایران کی جانب سے کیے گئے بیلسٹک میزائل حملے کے بعد وسطی اسرائیل میں دو مختلف مقامات پر چھ افراد زخمی ہو گئے جن میں سے ایک کی حالت تشویشناک بتائی جا رہی ہے۔
اسرائیلی میڈیا رپورٹس کے مطابق اس حملے میں ممکنہ طور پر کلسٹر وارہیڈ استعمال کیا گیا تھا۔ یہ اسی دن اسرائیل پر کیا جانے والا چھٹا میزائل حملہ تھا۔ایمبولینس سروس میگن ڈیوڈ ادوم (Magen David Adom) کے مطابق تل ابیب
میں چالیس سالہ ایک شخص شدید زخمی ہوا۔پیٹاح تکوا شہر میں مزید پانچ افراد زخمی ہوئے جن میں 25 سالہ ایک شخص کی حالت درمیانی نوعیت کی ہے جبکہ تین افراد کی حالت بہتر بتائی گئی ہے۔
پولیس حکام کے مطابق وسطی اسرائیل میں ایک درجن سے زائد مقامات پر میزائل گرنے کی اطلاعات ملی ہیں۔ ان مقامات کے پھیلاؤ سے اندازہ لگایا جا رہا ہے کہ ایرانی بیلسٹک میزائل میں کلسٹر بم وارہیڈ نصب تھا۔
رپورٹس میں دعویٰ کیا جارہا ہے کہ جاری تنازع کے دوران ایران متعدد بار ایسے بیلسٹک میزائل اسرائیل کی طرف داغ چکا ہے جن میں کلسٹر بم ہوتے ہیں جو بڑے علاقے میں چھوٹے بم پھیلا دیتے ہیں۔اسرائیلی فوج (IDF) نے بتایا کہ
تلاش اور امدادی ٹیمیں فوری طور پر متاثرہ مقامات پر روانہ کی گئیں اور حملوں کی نوعیت کی تحقیقات کی جا رہی ہیں۔موقع سے سامنے آنے والی تصاویر اور ویڈیوز میں بڑے پیمانے پر تباہی دکھائی دے رہی ہے۔
اتوار کی صبح 2 بجے سے شروع ہونے والے پہلے پانچ حملوں میں کسی شدید زخمی ہونے کی اطلاع نہیں ملی۔ اسی طرح اتوار کی دوپہر کے ساتویں اور آٹھویں حملوں میں بھی کسی نقصان یا زخمی ہونے کی خبر نہیں آئی۔
اس سے قبل ایران کے حملوں کے باعث اسرائیل کے وسطی، شمالی اور جنوبی علاقوں میں سائرن بج اٹھے اور لاکھوں افراد کو پناہ گاہوں میں جانا پڑا۔ اسرائیلی فوج کے ابتدائی اندازوں کے مطابق جنوبی اسرائیل کو نشانہ بنانے والا ایک
بیلسٹک میزائل ممکنہ طور پر فضا میں ہی تباہ کر دیا گیا۔مرکزی اسرائیل پر ایک اور حملے کے بعد میزائل کے ٹکڑے غیر آباد علاقوں میں گرنے کی اطلاعات بھی سامنے آئیں۔دوسری جانب سعودی عرب، متحدہ عرب امارات، قطر، کویت اور بحرین نے بھی نئے حملوں کی اطلاعات دی ہیں۔
یہ حملے اس وقت ہو رہے ہیں جب ایک ہفتہ قبل امریکہ اور اسرائیل نے تہران کے خلاف پیشگی فضائی حملے کیے تھے جس کے بعد ایران کے صدر نے جوابی کارروائی بڑھانے کا عزم ظاہر کیا تھا۔
امریکہ اور اسرائیل کی جانب سے ایران پر بڑے فضائی حملوں کے بعد خطے کے پڑوسی ممالک بھی اس کشیدگی کا نشانہ بنے ہیں۔ خبر رساں ادارے اے ایف پی کے مطابق جنگ شروع ہونے کے بعد خلیجی ممالک میں اب تک 16 افراد ہلاک ہو چکے ہیں جن میں آٹھ شہری شامل ہیں۔
