اسرائیل کا ایک بڑا ہاسپٹل ایران کے میزائل حملہ میں تباہ

ایران کے ایک میزائل نے جمعرات کی صبح جنوبی اسرائیل کے مرکزی اسپتال کو نشانہ بنایا، جس کے نتیجے میں کئی افراد زخمی ہوئے اور اسپتال کو شدید نقصان پہنچا۔ اسپتال انتظامیہ کے مطابق حملے سے مختلف حصوں میں "وسیع پیمانے پر تباہی” ہوئی۔ اسرائیلی میڈیا نے تباہ شدہ کھڑکیوں اور گھنے کالے دھوئیں کی ویڈیو نشر کی۔

 

اس حملے سے ہٹ کر ایران نے تل ابیب میں ایک بلند و بالا رہائشی عمارت اور دیگر مقامات کو بھی نشانہ بنایا۔ اسرائیل کی ایمبولینس سروس "ماگن ڈیوڈ آدوم” کے مطابق ان حملوں میں کم از کم 40 افراد زخمی ہوئے ہیں۔

 

دوسری جانب، اسرائیل نے ایران کے ایراک ہیوی واٹر ری ایکٹر پر فضائی حملہ کیا، جو ایران کے ایٹمی پروگرام پر اسرائیل کا تازہ ترین وار ہے۔ یہ حملہ اس سات روزہ تنازعے کے دوران ہوا جو اسرائیل کے اچانک فضائی حملوں سے شروع ہوا تھا، جن میں فوجی ٹھکانوں، اعلیٰ افسران اور نیوکلیئر سائنسدانوں کو نشانہ بنایا گیا تھا۔

 

جمعرات کو ایران کے میزائل حملے میں اسرائیل کے جنوبی حصے کا مرکزی اسپتال "سوروکا میڈیکل سینٹر” براہِ راست زد میں آیا۔ اسپتال کے ترجمان نے تصدیق کی کہ حملے سے اسپتال کے مختلف حصوں میں شدید نقصان ہوا ہے اور کچھ افراد زخمی ہوئے ہیں۔ اسپتال انتظامیہ نے عوام سے اپیل کی ہے کہ وہ علاج کے لیے فی الحال اسپتال نہ آئیں۔

 

سوروکا میڈیکل سینٹر میں 1,000 سے زائد بیڈز موجود ہیں اور یہ اسپتال جنوبی اسرائیل کے تقریباً 10 لاکھ افراد کو طبی سہولیات فراہم کرتا ہے