کینیڈا میں برٹش کولمبیا کے اسکول میں فائرنگ، 10 افراد ہلاک
کینیڈا کے صوبہ برٹش کولمبیا کے شمال مشرقی دیہی علاقے میں واقع ٹمبلر رج سیکنڈری اسکول میں ایک المناک فائرنگ کے واقعے میں 10 افراد ہلاک ہوگئے جس میں حملہ آور بھی شامل ہے۔ یہ واقعہ علاقے کے حالیہ برسوں میں سب سے خطرناک اور مہلک حادثات میں شمار کیا جا رہا ہے۔
رائل کینیڈین ماؤنٹڈ پولیس (RCMP) کے مطابق، اسکول کے اندر 6 افراد کی نعشیں برآمد ہوئیں، جبکہ ایک زخمی شخص ہاسپٹل پہنچنے کے دوران دم توڑ گیا۔ مزید دو افراد ایک مکان میں ہلاک پائے گئے، جس کا واقعی سے تعلق بتایا جا رہا ہے۔ پولیس کے مطابق، فائرنگ کرنے والا شخص بھی خود کو پہنچائی گئی چوٹ کے باعث ہلاک ہو چکا تھا۔
واقعہ کے بعد، دو شدید زخمیوں کو ہیلی کاپٹر کے ذریعہ ہاسپٹل منتقل کیا گیا، جبکہ تقریباً 25 دیگر افراد کو معمولی چوٹوں کے لیے مقامی طبی مرکز میں جانچ کرائی جا رہی ہے۔ پولیس نے واضح کیا ہے کہ اس وقت کسی اور مشتبہ فرد یا عوام کے لیے جاری خطرے کا کوئی ثبوت نہیں ملا، تاہم کمیونٹی میں دیگر مکانات کی تلاشی جاری ہے تاکہ کسی ممکنہ زخمی یا واقعہ سے جڑے فرد کا پتہ چلایا جا سکے۔
تفتیش میں معاونت کے لیے اضافی آر سی ایم پی اہلکار، بشمول میجر کرائم یونٹ کے افسران، تعینات کیے جا رہے ہیں۔ حکام مقامی اسکول ڈسٹرکٹ کے تعاون سے طلبہ کو والدین اور سرپرستوں سے دوبارہ ملانے کا انتظام کر رہے ہیں۔
نارتھ ڈسٹرکٹ کے چیف سپرنٹنڈنٹ کین فلائیڈ نے بیان میں کہا کہ یہ صورتحال نہایت حساس اور تیزی سے بدلنے والی تھی۔ اسکول عملہ، ابتدائی امدادی ٹیموں اور کمیونٹی کے فوری تعاون نے ہمارے ردعمل کو مؤثر بنایا۔ ان کا کہنا تھا کہ ہماری ہمدردیاں متاثرہ خاندانوں اور اس المناک واقعے سے متاثر ہونے والے تمام افراد کے ساتھ ہیں، اور کمیونٹی نے تفتیش کے دوران تعاون کے جو مظاہرے کیے، اس کے لیے ہم شکر گزار ہیں۔
