ترکی میں زبردست زلزلہ

نئی دہلی ۔ترکی کے وسطی علاقے میں شدت کا زلزلہ آیا۔ کونیہ صوبے کے کولو ضلع سے تقریباً 14 کلومیٹر دور اس کے جھٹکے شدت کے ساتھ محسوس کئے گئے

 

جس کی شدت ریکٹر اسکیل پر 5.2 درج کی گئی۔ جھٹکے دارالحکومت انقرہ سمیت متعدد قریبی شہروں میں بھی محسوس کیے گئے جس کے بعد عوام میں خوف و ہراس پھیل گیا اور لوگ گھروں و دفاتر سے باہر نکل آئے۔

 

مقامی ڈیزاسٹر مینجمنٹ اتھارٹی کے مطابق تاحال کسی جانی یا مالی نقصان کی اطلاع موصول نہیں ہوئی۔ امدادی ٹیمیں متاثرہ علاقوں میں حالات کا جائزہ لینے کے لیے سرگرم عمل ہیں۔

 

دوسری جانب یونان میں بھی چہارشنبہ کی صبح زلزلہ آیا جس کی شدت ریکٹر اسکیل پر 6.1 ریکارڈ کی گئی جس کا اثر مصر، اسرائیل، لبنان، ترکی اور اردن تک محسوس کیا گیا۔انقرہ کے مضافاتی علاقوں میں بھی معمولی زلزلے کے جھٹکوں کی اطلاعات ہیں۔

 

واضح رہے کہ ترکی دنیا کے اُن ممالک میں شامل ہے جہاں زلزلے بار بار آتے ہیں۔ فروری 2023 میں آنے والا زلزلہ ترکی اور شام کے لیے ہولناک ثابت ہوا تھا، جس میں ترکی میں 59,000 اور شام میں تقریباً 8,000 افراد جاں بحق ہوئے تھے جب کہ ہزاروں عمارتیں تباہ ہو گئی تھیں۔