امریکہ۔برفانی طوفان کے دوران طیارہ حادثہ کا شکار 7 ہلاک

نئی دہلی ۔امریکہ میں برفانی طوفان کی شدید صورتحال کے دوران ایک خانگی طیارہ حادثے کا شکار ہو گیا۔ اس حادثے میں سات افراد ہلاک جبکہ ایک شخص شدید زخمی ہو گیا۔

 

یہ افسوسناک واقعہ ریاست مائین کے بینگور انٹرنیشنل ایئرپورٹ پر پیش آیا۔حکام کے مطابق آٹھ افراد پر مشتمل ایک خانگی بزنس طیارہ مقامی وقت کے مطابق اتوار کی شام 7:45 بجے بینگور ایئرپورٹ سے روانہ ہوا۔ چند ہی لمحوں بعد طیارہ گر کر تباہ ہو گیا اور اس میں آگ بھڑک اٹھی۔

 

بتایا جا رہا ہے کہ حادثے کے وقت شدید برف باری ہو رہی تھی۔ اس واقعے کے بعد حکام نے ایئرپورٹ کو بند کر دیا۔ ہلاک ہونے والوں کی شناخت تاحال سامنے نہیں آ سکی۔اس حادثے کی تحقیقات فیڈرل ایوی ایشن ایڈمنسٹریشن (FAA) اور نیشنل ٹرانسپورٹیشن سیفٹی بورڈ (NTSB) کر رہے ہیں۔

 

برفانی طوفان کے باعث اتوار کے روز امریکہ بھر میں تقریباً 12 ہزار پروازیں منسوخ کر دی گئیں۔ فلائٹ ٹریکر ویب سائٹ FlightAware.com کے مطابق تقریباً 20 ہزار پروازیں تاخیر کا شکار ہوئیں۔ واشنگٹن، بالٹیمور، نارتھ کیرولائنا، نیویارک، نیو جرسی اور فلاڈیلفیا کے ایئرپورٹس پر فضائی خدمات بری طرح متاثر رہیں۔