آندھراپردیش میں چٹانوں کے گرنے سے 6 ہلاک

حیدرآباد۔ ریاست آندھراپردیش باپٹلہ ضلع میں اتوار کی صبح ایک خوفناک حادثہ پیش آیا۔ بلی کُروّا کے قریب "ستیہ کرشنا گرینائٹ مائنس” میں چٹانیں گرنے کے باعث چھ مزدور ہلاک ہو گئے۔

 

چٹانیں ٹوٹ کر گرنے کی وجہ سے یہ حادثہ پیش آیا۔ اب تک چار نعشوں کو ملبے سے نکالا جا چکا ہے جبکہ باقی دو نعشوں کو نکالنے کے لیے امدادی کارروائیاں جاری ہیں۔

 

حادثے کے وقت مائنس میں 16 مزدور کام کر رہے تھے۔ شدید زخمی ہونے والے مزید 10 مزدوروں کو بہتر علاج کے لیے نرسا راو پیٹ ہاسپٹل منتقل کیا گیا ہے۔ ڈاکٹروں کا کہنا ہے کہ ان میں سے چار کی حالت تشویشناک ہے۔

 

مائنس انتظامیہ کی جانب سے حفاظتی اقدامات کے بارے میں تحقیقات جاری ہیں۔آندھر پردیش کے چیف منسٹر این چندرابابو نائیڈو نے اس حادثہ میں ہونے والی اموات پر گہرے رنج کا اظہار کیا ہے۔