کرناٹک میں تنگبھدرا ڈیم کا ایک دروازہ پانی میں بہہ گیا _ آندھراپردیش کے کرنول ضلع میں چوکسی

کرنول _ کرناٹک کے ہوسپیٹ میں تنگھدرا ڈیم کا 19 واں گیٹ سیلاب میں بہہ گیا۔ جس کے نتیجے میں اب تک لاکھوں کیوسک پانی ضائع ہو چکا ہے۔ 19 واں گیٹ اس وقت ٹوٹ گیا اور بہہ گیا جب ہفتے کی رات 11 بجے گیٹ بند کیے جا رہے تھے کیونکہ ڈیم میں سیلاب کا کافی پانی جمع ہوگیا تھا

۔عہدیداروں نے بتایا کہ یہ واقعہ اس وقت پیش آیا جب بالائی سیلاب کے کم ہونے کے بعد ڈیم کے پانی کے ذخیرہ کو برقرار رکھا جا رہا تھا۔ایک گیٹ کے توٹ جانے کی وجہ سے اب ڈیم سے 60 ٹی ایم سی پانی کے اخراج کے بعد ہی گیٹ کی بحالی کا کام شروع کیا جائے گا۔ اس کے ایک حصے کے طور پر، فی الحال 33 دروازے کھولے جا رہے ہیں اور پانی کو نیچے چھوڑا جا رہا ہے۔ پچھلے 70 سالوں میں یہ پہلا موقع ہے جب ڈیم کی حفاظت سے متعلق اتنا بڑا واقعہ پیش آیا ہے۔

اس وقت تنگبھدرا سے شنکاسیلہ پراجیکٹ میں ایک لاکھ کیوسک کا سیلاب آ رہا ہے۔ تنگہ بھدرا بورڈ کے حکام نے دریا کے طاس کے لوگوں کو چوکس رہنے کی وارننگ جاری کی ہے۔ آندھرا پردیش کے کرنول ضلع کے کوتھلم، کوسیگی، منترالیم اور ننداوارم منڈلوں کے لوگوں کو محتاط رہنے کا مشورہ دیا گیا ہے۔