بہار میں 65 فیصد ریزرویشن پر لگی ہائی کورٹ کی روک

نئی دہلی _ 20 جون ( اردولیکس ڈیسک) پٹنہ ہائی کورٹ نے ریزرویشن کی حد 50 فیصد سے بڑھا کر 65 فیصد کرنے کے بہار کی نتیش کمار حکومت کے فیصلے کو منسوخ کر دیا ہے۔

 

ایس سی، ایس ٹی، ای بی سی اور دیگر پسماندہ طبقات کو سرکاری ملازمتوں میں ریزرویشن 50 فیصد سے بڑھا کر 65 فیصد کردیا گیا۔ اس طرح جنرل کیٹیگری کے لیے 35 فیصد حصہ رہ گیا جس میں EWS کے لیے 10 فیصد ریزرویشن بھی شامل ہے۔

 

یہ قانون 21 نومبر 2023 کو بہار اسمبلی میں پاس ہوا تھا۔ ریاستی حکومت نے اس سے قبل ذات پات کی مردم شماری کرائی تھی۔ اعداد و شمار کے سامنے آنے کے 50 دنوں کے اندر اس قانون کو نافذ کیا گیا۔

 

اس کے ساتھ ہی یہ معاملہ ہائی کورٹ تک پہنچ گیا تھا۔ اس سال 11 مارچ کو سماعت مکمل کرتے ہوئے ہائی کورٹ نے فیصلہ محفوظ کر لیا تھا۔ جمعرات کو چیف جسٹس کے ونود چندرن اور جسٹس ہریش کمار کی ڈویژن بنچ نے ریزرویشن قانون میں کی گئی ترمیم کو مسترد کر دیا۔