دارالعلوم دیوبند کے نام سے نقلی سوشل میڈیا اکاؤنٹس

نئی دہلی ۔ دارالعلوم دیوبند کی جانب سے واضح کیا گیا ہے کہ ادارے کا سوشل میڈیا پر کوئی آفیشل اکاؤنٹ نہیں ہے، مگر کچھ افراد دارالعلوم دیوبند کے نام سے فرضی اکاؤنٹس بنا کر ان کے ذریعہ مختلف پوسٹس کر رہے ہیں۔ ان پوسٹس کو دارالعلوم دیوبند کے پیغام کے طور پر سمجھا جا رہا ہے، اس لیے ادارہ یہ واضح کرتا ہے کہ اگر سوشل میڈیا کے کسی بھی پلیٹ فارم پر دارالعلوم دیوبند کے نام سے کوئی اکاؤنٹ یا پیج نظر آئے تو اسے ادارہ کا تصور نہ کیا جائے۔

واضح رہے کہ سوشل میڈیا پر دارالعلوم دیوبند سے منسوب کئی فرضی اکاؤنٹس بنا کر مختلف قسم کے پیغامات پھیلائے جا رہے ہیں، جس سے ادارے کی ساکھ کو نقصان پہنچ رہا ہے۔ اس سلسلے میں آج ادارے کے مہتمم و شیخ الحدیث مولانا مفتی ابوالقاسم نعمانی نے کہا کہ مختلف ذرائع سے معلوم ہوا ہے کہ دارالعلوم دیوبند کے نام سے سوشل میڈیا کے مختلف پلیٹ فارمس پر متعدد اکاؤنٹس فعال ہیں۔

ادارہ کی جانب سے کہا گیا ہے کہ دارالعلوم دیوبند سے متعلق تمام مستند خبریں، اعلانات اور معلومات صرف اور صرف دارالعلوم دیوبند کی آفیشل ویب سائٹ (www.darululoom-deoband.com) پر ہی فراہم کی جاتی ہیں۔ لہذا درخواست ہے کہ دارالعلوم دیوبند کا نام استعمال کرکے سوشل میڈیا اکاؤنٹس نہ بنائیں، کیونکہ یہ عمل غلط فہمی اور انتشار کا باعث بنتا ہے اور دارالعلوم دیوبند کے اصولوں اور ساکھ کے بھی خلاف ہے۔ چنانچہ جن حضرات نے

دارالعلوم دیوبند کے نام سے کوئی اکاؤنٹ یا پیج بنایا ہے ان سے اپیل ہے کہ وہ ادارے کے نام سے نقلی اکاؤنٹس ختم کر دیں اور دارالعلوم دیوبند کی عزت و وقار کا احترام کریں۔