تلنگانہ کے نظام آباد ضلع میں گرام پنچایت انتخابات – 9 مسلم امیدواروں کو سرپنچ کے عہدہ پر کامیابی

تلنگانہ میں پہلے مرحلہ کے گرام پنچایت انتخابات جمعرات کو منعقد ہوئے اور اس کے نتائج بھی سامنے آگئے ہیں

نظام آباد ضلع کی 184 گرام پنچایتوں کے انتخابات میں مسلم امیدواروں نے شاندار کارکردگی دکھاتے ہوئے مجموعی طور پر 9 سرپنچ نشستیں جیت لیں۔ اس کامیابی کو مقامی سطح پر مسلم نمائندگی کے مستحکم ہونے کے طور پر دیکھا جارہا ہے۔

کامیاب ہونے والوں میں نہرونگر سے کانگریس کی تائیدی امیدوار مسکان بیگم، فتح پور سے کانگریس کے نور احمد، فتح نگر سے بی آر ایس کی آصیفہ خاتون، پیپرو ملو سے آزاد امیدوار محی الدین، کنداکورتی سے کانگریس کے غوث الدین، سلیمان نگر سے کانگریس کی آفرین بیگم، سنگم سے کانگریس کے محمد عارف، ہنگرگ سے کانگریس کے اسماعیل خان اور کوپرگ سے کانگریس کے سید احمد شامل ہیں۔

ضلع بھر میں ان کامیابیوں پر خوشی کا ماحول دیکھا گیا، جبکہ سیاسی حلقوں کے مطابق یہ نتائج ترقیاتی وعدوں، عوامی رابطے اور مؤثر قیادت کی وجہ سے ممکن ہوئے ہیں، جو نظام آباد میں مسلم قیادت کے مضبوط ابھار کو ظاہر کرتے ہیں۔