عاشق کی نعش کے ساتھ معشوقہ نے کرلی شادی۔ مہاراشٹرا کے ناندیڑ میں عجیب و غریب واقعہ

ممبئی۔ ریاست مہاراشٹرا میں ایک عجیب و غریب واقعہ پیش آیا جہاں ایک لڑکی کے عبشق کو اس کے باپ اور بھائی نے قتل کر دیا جس پر غمزدہ لڑکی نے اپنے عاشق کی نعش کے ساتھ شادی کرلی۔

 

 

تفصیلات کے مطابق مہاراشٹرا کے ناندیڑ کے جھوناگنج علاقہ میں ایک 20 سالہ نوجوان کو بُری طرح پیٹا گیا اسے گولی ماری گئی اور بعد میں اس کا سر ایک پتھر سے کچل دیا گیا جس کے نتیجے میں اس کی موت ہوگئی۔ اس کی آخری رسومات کے دوران اس کی گرل فرینڈ نے اپنے ماتھے پر سندور لگایا اور نوجوان کے گھر میں ہی بہو کی حیثیت سے رہنے کا عہد کیا۔

 

 

مقامی لڑکی آنچل کی ملاقات سکشم ٹاٹے سے اپنے بھائیوں کے ذریعے ہوئی تھی اور وہ اس کے گھر آیا جایا کرتا تھا۔ ان دونوں کو ایک دوسرے سے محبت ہوگئی ۔ نوجوان کا تعلق دوسرے طبقہ سے تھا اس لئے لڑکی کے گھروالوں کو یہ رشتہ پسند نہیں تھا انھوں نے لڑکی کو کئی بار سمجھایا لیکن وہ نہیں مانی۔

 

 

اسی بنا پر انہوں نے لڑکے کا قتل کر دیا۔ باپ اور بھائی کو اس بات کا یقین تھا کہ نوجوان کے قتل کے بعد لڑکی کے دل سے اس کی محبت ختم ہوجائے گی لیکن ان کا یہ خیال خام خیالی ثابت ہوا کیونکہ لڑکی نے کہا کہ ’’جان چلی گئی لیکن وہی میرا شوہر ہے‘‘ اور اپنے محبوب کی نعش سے شادی کر لی۔