جموں و کشمیر کے ناؤگام پولیس اسٹیشن میں مہلک دھماکہ، 9 ہلاک، 25 زخمی – فرید آباد میں ضبط شدہ دھماکہ خیز مواد کی جانچ کے دوران حادثہ

جموں و کشمیر کے ناؤگام پولیس اسٹیشن میں مہلک دھماکہ، 9 اہلکار ہلاک، 25 زخمی

 

جموں و کشمیر کے ناؤگام پولیس اسٹیشن میں جمعہ کی رات ایک شدید دھماکہ ہوا، جس کے نتیجے میں 9 افراد ہلاک اور 25 زخمی ہو گئے۔ حکام کے مطابق ہلاک ہونے والے افراد میں پولیس جوان اور فارنسک ٹیم کے ارکان شامل ہیں۔

 

واقعہ جمعہ کی رات 11:22 بجے پیش آیا۔ دھماکے کے ساتھ شدید آگ بھڑک اٹھی اور گہرے دھوئیں نے پورے علاقے کو گھیر لیا۔ کئی افراد ملبے تلے دب گئے، جنہیں ریسکیو ٹیم نے فوری طور پر نکالا۔ مقامی لوگوں کے مطابق دھماکے کی شدت اتنی زیادہ تھی کہ تقریباً 300 میٹر کی دوری پر انسانی اعضا بکھر گئے۔ پولیس اسٹیشن کے پارکنگ ایریا میں موجود کئی گاڑیاں بھی آگ کی لپیٹ میں آ گئیں۔

 

عہدیداروں کے مطابق یہ دھماکہ حال ہی میں فرید آباد میں دہشت گردانہ سازش کے سلسلے میں ضبط کئے گئے دھماکہ خیز مواد سے نمونہ جات لینے کے دوران ہوا۔ واضح رہے کہ ہر یانہ اور جموں و کشمیر پولیس نے مشترکہ کارروائی میں فرید آباد کے ایک مکان سے 360 کلو دھماکہ خیز مواد اور متعدد ہتھیار ضبط کئے تھے، جنہیں بعد ازاں ناؤگام پولیس اسٹیشن منتقل کیا گیا تھا۔

 

دھماکہ کے بعد ہلاک شدگان کی نعشیں جائے وقوعہ سے بازیاب کر کے سری نگر کے پولیس کنٹرول روم منتقل کی گئی ہیں، تاہم ابھی تک ہلاک شدگان کی شناخت نہیں ہو سکی ہے۔ دھماکے سے پولیس اسٹیشن کی عمارت شدید نقصان پہنچا، اور متعدد چھوٹے دھماکے ریسکیو آپریشن میں رکاوٹ کا باعث بنے۔

 

حکام نے دھماکے کی وجوہات کی تحقیقات شروع کر دی ہیں اور جموں و کشمیر پولیس نے واقعے پر باضابطہ بیان جاری کرنا ہے۔