این ڈی اے نے سی پی رادھا کرشنن کو نائب صدر جمہوریہ کے امیدوار کے طور پر نامزد کیا
نئی دہلی: این ڈی اے کے طرف سے نائب صدر کے امیدوار کے نام پر جاری سسپنس ختم ہوگیا ہے۔ آج دہلی میں بی جے پی پارلیمانی پارٹی بورڈ کے اجلاس میں اس سلسلے میں اہم فیصلہ کیا گیا۔ بی جے پی کے قومی صدر جے پی نڈا نے اعلان کیا کہ این ڈی اے کی جانب سے نائب صدر کے امیدوار کے طور پر سی پی رادھا کرشنن کو نامزد کیا گیا ہے۔
سی پی رادھا کرشنن کی پیدائش 4 مئی 1957 کو ہوئی۔ وہ تمل ناڈو کے کوئمبتور لوک سبھا حلقے سے بی جے پی کے ٹکٹ پر دو بار رکن پارلیمنٹ منتخب ہوچکے ہیں۔ اسی کے ساتھ وہ تمل ناڈو بی جے پی کے ریاستی صدر بھی رہے۔ 2016 سے 2019 تک انہوں نے آل انڈیا کوئیر بورڈ کے چیئرمین کی حیثیت سے خدمات انجام دیں۔ وہ تمل ناڈو کے بی جے پی کے سینئر قائدین میں شمار کیے جاتے ہیں۔
18 فروری 2023 سے وہ جھارکھنڈ کے گورنر کی حیثیت سے کام کر رہے ہیں۔ اس سے قبل انہوں نے تلنگانہ اور پڈوچیری کے لیفٹننٹ گورنر کی اضافی ذمہ داریاں بھی سنبھالی تھیں۔ فی الحال وہ مہاراشٹرا کے گورنر ہیں۔
قابل ذکر ہے کہ نائب صدر کے امیدوار کے انتخاب کا اختیار این ڈی اے جماعتوں نے وزیراعظم نریندر مودی اور بی جے پی صدر جے پی نڈا کو دیا تھا۔ نیا نامزد امیدوار 21 اگست تک اپنا پرچہ نامزدگی داخل کرسکے گا۔
