امتحان سے ایک دن قبل لیک ہوا تھا نیٹ کا سوالیہ پیپر

حیدرآباد _ 20 جون ( اردولیکس ڈیسک) میڈیکل کالجوں میں داخلے کے لئے منعقدہ نیٹ امتحان کے تنازعہ کے درمیان، بہار سے گرفتار چار افراد نے اعتراف کیا ہے کہ داخلہ امتحان کا سوالیہ پرچہ امتحان سے ایک روز قبل لیک ہوا تھا۔

نیٹ کا سوالیہ پرچہ لیک ہونے اور 1,500 سے زیادہ طلباء کو  گریس مارکس دینے کے خلاف طلباء نے شدید احتجاج کیا۔ جس کے نتیجے میں گریس مارکس کو ختم کر دیا گیا اور طلباء کو دوبارہ ٹیسٹ کی پیشکش کی گئی، اور وزیر تعلیم نے پیپر لیک ہونے کی اطلاعات کو غلط قرار دیا تھا لیکن بہار سے گرفتار کیے گئے چار افراد نے پیپر لیک ہونے کا اعتراف کیا ہے ان کی شناخت انوراگ یادو، نتیش کمار، امیت آنند کے علاوہ داناپور میونسپل کونسل کے جونیئر انجینئر سکندر یادوینڈو کے طور پر کی گئی ہے۔

ملزمین نے اعتراف کیا کہ انہیں امتحان سے ایک دن قبل سوالیہ پرچہ ملا تھا اور اسے پڑھ کر ہی انھوں نے امتحان لکھا تھا۔ پولیس کو دئے گئے ایک بیان میں، انہوں نے کہا کہ اگلے دن امتحان میں انھیں ایک دن قبل ملنے والے پیپر کے عین سوال پوچھے گئے تھے۔ایک امیدوار انوراگ یادو نے کہا کہ اس کے چچا سکندر یادوینڈو نے سوالیہ پرچہ اور اس کی جوابی شیٹ اسے اور دیگر دو امیدواروں کو دی۔